බෙදුම්වාදී ත්‍රස්තවාදයට අත්කර දුන් පරාජය දේශයේ ස්වාධිනත්වය, ඒකීයභාවය, භෞමික අඛණ්ඩතාවය, ජාතික ආරක්ෂාව පිළිබඳ අපේක්ෂාවන්ගේ සංඛේතයක් බව ජනාධිපති ගෝඨාභය රාජපක්ෂ මහතා පවසයි.
ත්‍රස්තවාදය ස්ථීර ලෙස පරාජය කර රටට සාමය සහජීවනය උදාකළ විරෝධාර රණවිරුවන්ට කෘතඥතාව පළ කෙරෙන රණවිරු දිනය වෙනුවෙන් පණිවුඩයක් නිකුත් කරමින් ජනාධිපතිවරයා මේ බව සඳහන් කළේය.
දිනාගත් නිදහස හා සාමය අර්ථවත් කිරිමට නම් ස්වාධින ජාතියක් ලෙස එක්ව නැඟී සිටිය යුතු බව ජනාධිපතිවරයා පෙන්වා දෙයි.
පසුගිය සමයේ රටේ ඒකීයභාවයට සහ ජාතික ආරක්ෂාවට උද්ගත වූ තර්ජන හමුවේ මව්බිමට ඇළුම් කරන සමස්ත ජනතාවම කම්පාවට පත්ව සිටි අතර ලොව විනය ගරුක හමුදාවක් ලෙස කීර්තියට පත් මෙරට සන්නද්ධ හමුදා නිලධාරින්ගේ ගෞරවයට හානි කළ බොහෝ දේ එම කාලයේදී සිදු වූ බව ජනාධිපතිවරයා සඳහන් කළේය.
ඉන් සංවේගයට පත් ජනතාවගේ අපේක්ෂාව වුයේ අසාධාරණය වෙනුවට සාධාරණය තහවුරු කොට රණවිරුවා කළ කැපකිරිමට නිසි ගෞරවය අත්කරදිම බව පෙන්වා දුන් ජනාධිපති ගෝඨාභය රාජපක්ෂ මහතා එම ප්‍රාර්තනාවා ඉටු කිරිමට වත්මන් රජයට හැකි වූ බව කියා සිටියේය.