පසුගිය මැතිවරණ සමය පුරා මෙගා ඩීල්ගැන කළ ප්‍රකාශ එකක්වත් සත්‍ය නොවීම නිසා ඇමති පාඨලී චම්පික රණවක, සහ අනුර දිසානායක ගළේ පහරපු බළලුන්ගේ තත්වයට පත්ව ඇතැයි පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල මහතා පවසයි.
ඇවන්ගාඩ් සිද්ධිය සම්බන්ධයෙන් කවුරුන් හෝ අත්අඩංගුවට ගත යුතුය යන ස්ථාවරයේ ඇමතිවරුන් කිහිපදෙනෙකු සිටින බවත්, අත්අඩංගුවට ගැනීමක් සිදු නොවුනහොත් එම ඇමතිවරුන් ආණ්ඩුවෙන් ඉවත්වන බවට ප්‍රකාශ කරමින් සිටින බවත් දැනගන්නට ඇතැයි ගම්මන්පිල මහතා ප්‍රකාශ කරයි. එමෙන්ම තිලක් මාරපන අමාත්‍යවරයා ඉල්ලා අස්වූයේ ආණ්ඩුව රැකැනීම සදහා අගමැතිවරයා උපදෙස් දී ඇති බැවින් විය හැකි බවද අද පෙරවරුවේ කොළඹදී පැවති මාධ්‍ය හමුවක් අමතමින් හෙතෙම මේ බව පැවසීය.
දෙමළ සිරකරුවන් 217 දෙනෙකු නිදහස් කිරීමට රජය පියවරගෙන ඇති බවත්, චෝදනා නැතිනම් මොවුන් මෙච්චර කාලයක් රඳවා ගැනීමට අවශ්‍යතාවයක් නැති බවත්, ත්‍රස්තවාදී ක්‍රියාවලට දඬුවම් නොකර මෙසේ නිදහස් කිරීම ගැටලුවක් බවත් හෙතෙම පෙන්වාදුන්නේය.
ගෝඨාභය රාජපක්ෂ, සරත් ෆොන්සේකා ඉලක්ක කර බෝම්බ පුපුරුවා හැරීම මෙහෙයවූ බුද්ධි අංශ නායකයින් වන මොරිස් හා ගිරි යන මේ අතර සිටින බවද ඔහු කියා සිටියේය.
මේ අතර මාදුළුවාවේ සෝභිත හිමියන් වෙනුවෙන් කළ හැකි ලොකුම රාජ්‍ය අනුග්‍රහය නම් උන්වහන්සේට පොරොන්දු වූ හා උන්වහන්සේ ප්‍රාර්ථනා කළ සාධාරණ සමාජය බිහි කිරීමට අවංකව කටයුතු කිරීම යැයිද පැවසූ ගම්මන්පිල මහතා සෝභිත හිමියන් අවසන් කාලයේදී සිටියේ සිත්තැවුලෙන් බවද පැවසීය.