හිටපු අමාත්‍ය රිෂාඩ් බදියුදීන් මහතා විසින් ඉදිරිපත් කර ඇති මූලික අයිතිවාසිකම් පෙත්සම සළකා බැලීම සඳහා කැඳවූ අවස්ථාවේ දී එක් විනිසුරුවරයෙකු ඉවත්වීම නිසා එය සළකා බැලීම අගෝස්තු මස 7 වන දා තෙක් කල් තැබීමට ශ්‍රේෂ්ඨාධිකරණය නියම කළේය.
එම පෙත්සම අද (27)දින ප්‍රියන්ත ජයවර්ධන, එල්. ටී. බී. දෙහිදෙනිය සහ යසන්ත කෝදාගොඩ යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් ඉදිරියේ කැඳවනු ලැබීය.
එහිදී විනිසුරු ප්‍රියන්ත ජයවර්ධන මහතා විවෘත අධිකරණය සඳහන් කළේ පෞද්ගලික හේතුවක් මත තමා මෙම පෙත්සම සළකා බැලීමෙන් ඉවත් වන බවය.
ඒ අනුව පෙත්සම සලකා බැලීම වෙනත් විනිසුරු මඩුල්ලක් ඉදිරියේ අගෝස්තු මස 7 වනදා කැඳවීමට නියම කෙරුණි.
අපරාධ පරීක්ෂණ දෙපාර්තමේන්තුව විසින් තමන්ව අත්අඩංගුවට ගැනීම වැළැක්වීමේ තහනම් නියෝගයක් නිකුත් කරන ලෙස ඉල්ලා හිටපු අමාත්‍ය රිෂාඩ් බදියුදීන් මහතා විසින් මෙම පෙත්සම ගොනු කර තිබුණි.