උසස් තාක්ෂණික ගණකාධීකරන ඩිප්ලෝමා සිසුන්ගේ සියලු ඉල්ලීම්වලට විසදුම් ලබා දෙන බවට 29 දා පෙරවරුවෙන් තමන් ඇතුළු නිලධාරීන් විසින් පොරොන්දුවක් දුන් බැවින් එම සිසුන්ට විරෝධතා පැවැත්වීමට කිසිදු උවමනාවක් නැතැයි උසස් අධ්‍යාපන අමාත්‍ය ලක්ෂ්මන් කිරිඇල්ල මහතා පවසයි.
අදාළ ඩිප්ලෝමාවට උපාධිය මෙන් සමානාත්මතාවක්‌ ලබා දීමට ආණ්‌ඩුව සූදානම් බව එදින පෙරවරුවේ එම ශිෂ්‍ය සංගම් නියෝජිතයන්ට පැහැදිලි පොරොන්දුවක් දුන් බවත් එහෙත් එය සිසුන් නොතැකුවේ මන්දැයි සොයා බැලීමට සිව් පුද්ගල කමිටුවක්‌ද පත්කරන බවත් ඇමැතිවරයා ‘දිවයින’ ට ඊයේ (30 දා) පැවැසීය.
එම ඩිප්ලෝමාවට සමානත්මතාවක්‌ ලබා දී තිබුණත් පසුගිය ආණ්‌ඩුව විසින් එය අහෝසි කළ බවත්, එය නැවතත් ඇති කිරීම සඳහා අමාත්‍යාංශය දළ කැබිනට්‌ පත්‍රිකාවක්‌ද සකසා අදාළ ඩිප්ලෝමාධාරීන්ට රජයේ රැකියාද ලබාදෙන ලෙස රාජ්‍ය පරිපාලන අමාත්‍යාංශයට ලිපි පවා යවා තිබූ බවද හෙතෙම සඳහන් කළේය.
එහෙත් ඒ කිසිවක්‌ නොතකා එම සිසුන් පෙළපාලි පැවැත්වූයේ පෙරටුගාමී සමාජවාදී පක්‍ෂයට ‘කොක්කක්’ ඇද ගැනීමට උවමනාවී තිබූ බැවින් බව ද කිරිඇල්ල ඇමැතිවරයා කියා සිටියේය.