රුපියල් 25,000ක අල්ලසක් ලබා ගැනීමේ සිද්ධියක් සම්බන්ධයෙන් අත්අඩංගුවට ගත් මාවනැල්ල මත්ද්‍රව්‍යනාශක කාර්යාංශයට අනුයුක්ත නිලධාරියා ලබන 31 වැනිදා දක්වා තවදුරටත් රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් ලංකා ජයරත්න මෙනවිය අද (25)දින නියෝග කළාය.
රිමාන්ඩ් භාරයට පත්කර සිටි මෙම සැකකරු අද බන්ධනාගාර නිලධාරීන් විසින් අධිකරණයට ඉදිරිපත් කර තිබුණි.
මෙම සිද්ධිය සම්බන්ධයෙන් තවදුරටත් පරීක්ෂණ සිදුකරන බව අල්ලස් කොමිසම අධිකරණයට දන්වා සිටියේය.
ඒ අනුව සැකකරු ලබන 31 වැනිදා දක්වා රක්ෂිත බන්ධනාගාර ගතකිරීමට නියම කළ මහෙස්ත්‍රාත්වරිය එදින පරීක්ෂණවල ප්‍රගතිය වාර්තා කරන ලෙස අල්ලස් කොමිසමට නියම කළේය.
මාවනැල්ල ප්‍රදේශයේ මත්ද්‍රව්‍ය සාදයක් පැවැත්වූ පුද්ගලයෙකුට එරෙහිව නීතිය ක්‍රියාත්මක නොකර සිටීම සඳහා රුපියල් 25,000ක මුදලක් අල්ලස් වශයෙන් ඉල්ලා එය ලබා ගත් අවස්ථාවේ දී අල්ලස් කොමිසමේ නිලධාරීන් විසින් මෙම නිලධාරියා අත්අඩංගුට ගෙන තිබුණි.