ඉන්දියාවෙන් සොරාගෙන ඇතිබව කියවෙන කොහිනූර් දියමන්තිය නැවත ඉන්දියාවට භාර දෙන ලෙස ඉල්ලා බ්‍රිතාන්‍යය රැජිණට නඩු පැවරීමට සූදානම් වෙයි. ඉන්දියාවේ බොලිවුඩ් තරු සහ ව්‍යාපාරිකයන් කණ්ඩායමක් එක්ව මෙලෙස එම දියමන්තිය නැවත ඉන්දියාවට ලබා ගැනීමේ උත්සාහයක නිරත වී සිටින බව වාර්තා වේ.
ලොව මෙතෙක් හමු වූ විශාලතම දියමන්ති වලින් එකක් යැයි සැලකෙන පවුම් මිලියන 100කට අධික වටිනාකමකින් යුත් කොහිනූර් දියමන්තිය බ්‍රිතාන්‍ය රාජකීය ආභරණ වලින් එකක් වන අතර එය හයවන ජෝර්ජ් රජුගේ සහ දෙවන එළිසබෙත් රැජිනගේ ඔටුනු පැලදවීමේ උත්සවයේ දී පළදින ලද ඔටුන්නේ ඔබ්බවා තිබේ. ඉන්දියාව බ්‍රිතාන්‍ය යටත් විජිතයක්ව පැවති සමයේ පන්ජාබයේ මහාරාජා වන දුලීප් සිං විසින් කොහිනූර් දියමන්තිය රැජිනට ලබා දුන් බව පැවසෙයි.
කොහිනූර් යන්නෙහි අර්තය වන ‘ආලෝකයේ කන්ද’ (Mountain of Light) යන නමින් හඳුන්වන මෙම දියමන්තිය මිළ කල නොහැකි පාෂාණයක් පමණක් නොව ඉන්දීය සංස්කෘතියේ සහ ඉතිහාසයේ කොටසක් බවද එහි අයිතිය වෙනුවෙන් සටන් වදින කණ්ඩායම පවසයි.
