ලෙබනනයේ සහ සෞදියේ සේවයට ගොස්‌ සිටින ශ්‍රී ලාංකික කාන්තාවන් නවදෙනකු වරදකරුවන් වී මරණ දණ්‌ඩනයට ලක්‌ව සිටින බව විදේශ රැකියා ඇමැතිනී තලතා අතුකෝරළ මහත්මිය පැවසුවාය. සෞදියේ වරදකරු වී සිටින ශ්‍රී ලාංකික කාන්තාවට ගල්ගසා මරා දැමීමට එරට අධිකරණය තීන්දු කර ඇතැයි ද ඇමැතිවරිය කියා සිටී.
විපක්ෂයේ සිටින විට ඇතැමුන් රටට වැඩිම විදේශ විනිමය ගෙන එන්නේ විදෙස්‌ගත කාන්තාවන් යැයි කියමින් කාන්තා දිනය අභිමානයෙන් සැමරුව ද මැදපෙරදිග රටවලට කාන්තාවන් යෑවීමේ හා එහිදී ඔවුනට අත්වන ඉරණමට නිසි විසඳුම් දෙනතුරු සිතට සැනසිල්ලක්‌ නොමැති බව ද අමාත්‍යවරිය කියා සිටී.
විදේශ රැකියා සඳහා මැදපෙරදිගට යන කාන්තාවන්ට අයවැය මගින් අවම වැටුපක්‌ තීරණය කරන ලෙස තමා මුදල් ඇමැතිවරයාගෙන් ඉල්ලා සිටින බවත් විදේශගතවන ශ්‍රමිකයන්ගේ ප්‍රශ්ණ එක රැයකින් විසඳිය නොහැකි වුවත් ඒ වෙනුවෙන් කළ හැකි ඉහළම මෙහෙවර කිරීමට තමා පසුබට නොවන බවත් ඇමැතිවරිය තවදුරටත් පැවසුවාය.