අයි. එස්. ත්‍රස්තවාදීන්ට එරෙහිව සිරියාව ගෙන යන සටනට චීනයෙද සහයෝගය හිමිව තිබේ. සිය යුද උපදේශකයින් පිරිසක් සිරියාව වෙත පිටත් කර යැවීමට චීනය කටයුතු කර ඇති අතර ඔවුන් රැගත් නෞකාව සූවස් ඇළ හරහා මේ වනවිට සිරියාවට ලඟා වී ඇති බව පැවසේ.
චීන නෞකාව ගැන සඳහන් කරමින් ඊශ්‍රායල වෙබ් අඩවියක් වාර්තා කර ඇත්තේ ලාසානින්-G-16 නැමැති චීනයට අයත් ගුවන් යානා රැගත් ප්‍රහාරක නෞකාව සිරියාවේ මාටාස් වරායේ දක්නට තිබූ බවත් මිසයිල හාරක නෞකාවක්ද එම නැව සමග සිරියාව වෙත පැමිණ ඇති බවය.
මීට අමතරව අයි.එස්. ත්‍රස්තවාදීන්ට එරෙහිව සටන් මෙහෙයවීම සඳහා රුසියාව, ඉරානය, ඉරාකය හා සිරියාව එක්ව සම්බන්ධීකරණ මධ්‍යස්ථානයක් බැග්ඩෑඩ් නුවර ගොඩනැගීම සඳහා කටයුතු කරමින් සිටින බව වාර්තා වේ. මේ පිළිබඳව අදහස් දක්වමින් ප්‍රකාශ කර ඇත්තේ අයි.එස්. ත්‍රස්තවාදීන්ට එරෙහිව ප්‍රහාර එල්ල කිරීම සඳහා තොරතුරු රැස් කිරීම, ප්‍රහාරයන් මෙහෙය වීම, ඒකාබද්ධව කටයුතු කිරීම මෙම සම්බන්ධීකරණ මධ්‍යස්ථානය හරහා සිදු කිරීමට නියමිත බවය.