රංගන ශිල්පී රයන් වැන්රොයන් මහතා ලබන 25 වැනිදා තෙක් තව දුරටත් රිමාන්ඩ් බාරයේ තබන ලෙස මාතර වැඩබලන මහේස්ත්‍රාත් හා නීතිඥ ආරියසේන පනංගල මහතා අද (11) නියෝග කළේය.
දකුණේ ප්‍රබල පාතාල කල්ලි නායක මාකදුරේ මදුෂ් සමග ඩුබායි හී දී අත්අඩංගුවට පත් ඔහු එරටින් පිටුවහල් කිරිමෙන් පසු පොලීසිය සැකපිටඅත්අඩංගුවට ගෙන තිබුණි.
පසුව එම සැකකරු ඉකුත් 05 වැනි දින මාතර ප්‍රධාන මහේස්ත්‍රාත් ඉසුරු නෙත්තිකුමාර මහතා හමුවට ඉදිරිපත්කළ අවස්ථාවේදී අද (11) වන තෙක් රිමාන්ඩ් භාරයට පත් කරන ලදි.
ඒ අනුව බන්ධනාගාර නිලධාරීන් විසින් ඔහු මාතර අධිකරණය වෙත කැදවා ගෙන විත් ඉදිරිපත් කළේය.
සැකකරුට අයත් බව කියන මෝටර් රථය තුළ තිබී කේරල ගංජා මිලි ග්‍රෑම් 5750 ක ප්‍රමාණයක් පොලීසිය සොයා ගෙන තිබුණි.
එම මෝටර් රථය ඩුබායිහීදී අත් අඩංගුවට පත් අමිල ප්‍රසංග හෙට්ටිගේ නොහොත් සන්ෂයින් සුද්දා යන අයට අයත් මිරිස්සේ හෝටලයක දමා ගොස් තිබියදී පොලීසිය සොයා ගෙන තිබුණි.
අදාල මෝටර් රථය ලියාපදිංචි කර තිබුණේ උස්වැටකෙයියාව ප්‍රදේශයේ කාන්තාවකගේ නමට බව පොලීසිය සදහන් කරයි.
මාතර කොට්ඨාසය භාර පොලිස් අධිකාරී ගයංග හසන්ත මාරපන මහතාගේ උපදෙස් මත වැලිගම මූලස්ථාන පොලීසිය මේ පිළිබඳව වැඩිදුර පරීක්ෂණ මෙහෙයවති.