ඔක්තෝබර් 26 වනදාට පෙර පැවති ආකාරයට අග්‍රාමාත්‍යවරයකු පත් කරගැනීම සඳහා එක්සත් ජාතික පෙරමුණට තමන්ගේ සහාය දක්වන බව ප්‍රකාශ කළ ද එජාපෙ රජයට එක්වීමේ අදහසක් තමන්ට නොමැති බව දෙමළ ජාතික සන්ධානයේ පාර්ලිමේන්තු මන්ත්‍රී එම්. ඒ. සුමන්දිරන් මහතා පවසයි.
තමන් මැදිහත් වන්නේ රටේ පවතින දේශපාලන අස්ථාවරභාවය අවසන් කිරීම සඳහා බව අවධාරණය කරමින් ඒ මහතා සඳහන් කළේ එම අස්ථාවරභාවයට වගකිව යුතුවන්නේ ජනාධිපතිවරයා බවයි. එහෙයින් ජනාධිපතිවරයා ම ක්‍රියාත්මක වී මෙම අස්ථාවරභාවය අවසන් කිරීමට දැන් කටයුතු කළ යුතු බව ඒ මහතා පෙන්වා දුන්නේය.
ඔක්තෝබර් 26 වනදා ජනාධිපතිවරයා කළ ක්‍රියාව නීතිවිරෝධී බවත් ආණ්ඩුක්‍රම ව්‍යවස්ථාවට පටහැණි බවත් පැවසූ සුමන්දිරන් මහතා එදිනට පෙර පැවති තත්වයට රට නැවත ගෙන ඒම සඳහා තම සහයෝගය එජාපෙට ලබාදෙන බව ප්‍රකාශ කළේය.