ශ්‍රී ලංකාවේ ස්ථිර පදිංචිය සඳහා වීසා බලපත්‍ර ලබා දීමේ කාලය අවුරුදු පහේ සිට අවුරුදු දහය දක්වා දීර්ඝ කිරීමට සහ ඒ සඳහා ඇති බලය ආරක්ෂක ඇමැතිවරයා වෙත පැවරීමටත් රජය සූදානම් වේ.
ආගමන හා විගමන පනත සංශෝධනය කිරීම සඳහා ආරක්ෂක අමාත්‍යාංශය විසින් පසුගිය සතියේ ප්‍රකාශයට පත් කරන ලද පනත් කෙටුම්පත ඔස්සේ රජය මෙම සංශෝධන යෝජනා කර ඇත.
වීසා බලපත්‍ර නිකුත් කිරීමේ බලය ලත් ආයතනය වන ආගමන හා විගමන දෙපාර්තමේන්තුවේ පාලක ජෙනරාල්වරයා විසින් දැනට පවතින නීතිය යටතේ ස්ථිර පදිංචිය සඳහා වීසා බලපත්‍ර ලබා දීම දැනට අවුරුදු 02 සිට 05 දක්වා සිදුකරනු ලැබේ.
සංශෝධනයට අනුව වසර පහේ සිට වසර දහය දක්වා ස්ථිර පදිංචිය සඳහා වීසා බලපත්‍ර ලබා දීමේ කාලය දීර්ඝ කිරීමේ බලය ආරක්ෂක ඇමැතිවරයා ලෙස ජනාධිපති ගෝඨාභය රාජපක්ෂගේ අභිමතය පරිදි සිදු කිරීමටත් තීරණය කර ඇත.