ශ්‍රී ලංකාවේ සිටින චීන ජාතිකයන්ට සාමාන්‍ය පරිදි සලකන ලෙසද, ඔවුන් කිසිවිටක කොන්නොකරන ලෙසද ශ්‍රී ලාංකිකයන්ගෙන් ඉල්ලා සිටින බව සෞඛ්‍ය, පෝෂණ හා දේශීය වෛද්‍ය ඇමැතිනී පවිත්‍රා වන්නිආරච්චි මහත්මිය අද(03) පැවසුවාය.
කොළඹ එම අමාත්‍යංශයේ පැවැති ප්‍රවෘත්ති සාකච්ඡාවකදී ඇය මේ බව සඳහන් කළාය.
චීනය සහ ශ්‍රී ලංකාව අතර අනාදිමත් කාලයක සිට සමීප සබඳතාවක් පවතින අතර කොරෝනා වයිරසය හේතුකරගෙන එම සබඳතා පළුදු කරගත යුතු නැතැයිද එහිදී ඇමැතිවරිය කීවාය.
මෙරට විවිධ ව්‍යාපෘතිවල සේවය කරන චීන ජාතිකයන් කොන්කිරීමට හෝ ඔවුන් සමඟ එක්ව වැඩකිරීම ප්‍රතික්ෂේප කිරීමට හෝ ශ්‍රී ලාංකිකයන් යොමු නොවනු ඇතැයි තමා විශ්වාස කරන බවද ඇය ප්‍රකාශ කළාය.