පොලිස් මාධ්‍ය ප්‍රකාශක, නියෝජ්‍ය පොලිස්පති, නීතිඥ නිහාල් තල්දූව මහතා පවසන්නේ යුක්තිය මෙහෙයුම මගින් ගතවූ කාලය තුළ රුපියල් ලක්ෂ අසූ පන් දහසකට අධික වටිනාකමකින් යුත් මත්ද්‍රව්‍ය අත්අඩංගුවට ගෙන ඇති බවයි.
එමෙන්ම මෙම මෙහෙයුම මගින් සැකකරුවන් 68,577 දෙනෙකු අත්අඩංගුවට ගෙන ඇති බව මාධ්‍ය ප්‍රකාශකවරයා පැවසුවේ ය.
මෙම මෙහෙයුම හරහා නීති විරෝධීව ඉපැයූ රුපියල් මිලියන 725 කට වැඩි වත්කම් පොලිසිය භාරයට ගෙන ඇතැයිද ඔහු පැවසුවේ ය.
යුක්තිය මෙහෙයුම අද සිට තවදුරටත් ශක්තිමත් කිරිමට පියවර ගෙන ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දුව මහතා වැඩිදුරටත් පවසයි.
ඔහු පැවසුවේ , එම මෙහෙයුම් අධීක්ෂණය සඳහා අද සිට කොට්ඨාස 45 ක් සඳහා නිලධාරින් අනියුක්ත කෙරෙන බවයි.
යුක්තිය මෙහෙයුම අඛණ්ඩව පවත්වා ගෙන යෑම සඳහා අවශ්‍ය අවස්ථාවල ත්‍රිවිද හමුදා සහය ලබා ගැනීමට ද සැලසුම් කර ඇතැයි පොලිස් මාධ්‍ය ප්‍රකාශකවරයා පැවසුවේ ය.
නියෝජ්‍ය පොලිස්පති නීතිඥ නිහාල් තල්දුව මහතා කියා සිටියේ පොලිස් විශේෂ කාර්ය බලකාය ද මෙහෙයුම් සඳහා අඛණ්ඩව ක්‍රියාත්මක බවයි.