දරුවන්ගේ අධ්‍යාපන කටයුතුවල දී ඇති ව තිබෙන ගැටලුකාරී තත්ත්වයට ජනාධිපතිවරයා හා අගමැතිවරයා මැදිහත් වී හැකි ඉක්මනින් විසඳුමක් ලබාදිය යුතු බව ආදිවාසි නායක ඌරුවරිගේ වන්නිලඇත්තෝ පවසති.
මාධ්‍ය වෙත අදහස් දක්වමින් ඔහු සඳහන් කර සිටියේ, රටේ සිටින සියලුම දරුවන්ට අධ්‍යාපනය එක හා සමානව නොලැබෙන බවය.
වැඩිදුරටත් අදහස් දැක්වු ඌරුවරිගේ වන්නිලඇත්තෝ,
“පාසල්වල ඉගෙන ගන්නා දරුදැරියෝ හැමෝටම මේ රටේ අධ්‍යාපනය කියන එක මඟ ඇරිලා තියෙන කාලයක්. මගේ ඇස් දෙකට මම දැකලා තියෙනවා ළමයි ගොඩදෙනෙක් මහන්සි වෙනවා. රෑ දවල් නොබලා කඳු නඟිනවා. ගල් උඩ නඟිනවා. ගස් උඩ මැස්සවල් ගහගෙන ඉන්නවා. ඇත්තටම ඒ වැඩේ උනත් සමහර තැන්වල ගෙදර ඉදලා දුරකථන භාවිත කරලා උගන්වන්න තිබුණා. සමහර තැන්වල සාර්ථක වුණා. සමහර තැන්වල කරදරවෙලා දුක්වෙලා ළමයි ඉගෙන ගත්තා. දැන් මට දැනගන්න ලැබෙනවා පහුගිය දිනවල කොළඹ පැත්තේ මිනිස්සුන්ගේ ඉල්ලීම් ලබාදෙන ලෙස උද්ඝෝෂණයක්. එතැනදී ඒ අය අල්ලලා නිරෝධානයට අරන් ගිහිල්ලා. ඒ වගේ සිද්ධියක් වෙලා තියෙනවා. හැබැයි ඒක මූලික කරගෙන ඉගෙන ගන්න දරුවන්ට දුරකථනවලින් උගන්නපු ගුරුවරු ඒ අය දැන් මේක නතර කරන්න ලෑස්ති වෙලා. එහෙම වුනොත් ඇත්තටම අපේ රටේ ඉදිරි කාලේ දී මේ රට භාරගන්න ඉන්න දරුදැරියෝ අසරණ වෙනවා. ඒ හින්ද මම කියන්නේ මේ රට පාලනය කරන ජනාධිපතිවරයා හෝ අගමැතිවරයා මේ ගැටලු ගැන මීට වැඩිය හිතට අරගෙන හොයලා බලන්න ඕන. මේ දරු දැරියෝ ගැන හිතලා මේ ගැටලුවට මැදිහත් වෙලා මේක විසඳගන්න ඕන.“