හිටපු අමාත්‍ය රිෂාඩ් බදුර්ඩින් මහතාගේ බොරැල්ල නිවසේ මෙහෙකාර සේවයේ යෙදි සිටියදි සිරුරට ගිනි ඇවිලිමෙන් මිය ගියේ යැයි කියන ජේ.ඉෂාලිනි නැමති 16 හැවිරදි දැරියගේ මරණය සම්බන්ධයෙන් දැනට පොලිසිය විසින් අත්අඩංගුවට ගෙන ඇති සැකකරුවන්ට අධිකරණය හමුවේ උපරිම දඩුවම් ලබාදෙන ලෙස බල කරමින් තලවකැලේ ප්‍රදේශවාසින් පිරිසක් තලවකැලේ බස් නැවතුම්පොල අසල (25) දින උද්ඝෝෂනයක නිරත විය.
තලවකැලේ ලිදුල නගර සභාවේ හිටපු සභාපති අශෝක සේපාල මහතා විසින් ප්‍රදේශයේ ජනතාවගේ සහයෝගය ඇතිව මෙම උද්ඝෝෂනය සංවිධානය කර තිබුණි.
මෙම උද්ඝෝෂණයේදි අදහස් දැක් වු අශෝක සේපාල මහතා කියා සිටියේ වතු ආශ්‍රිත ළමුන් විශාල පිරිසක් මේ වන විට දිවයිනේ විවිධ ප්‍රදේශවල ගෘහ සේවයේ යෙදවා ඇති බවත්, එම දරුවන් මෙහෙකාර සේවයෙන් මුදාගෙන යලිත් මේ රටේ ළමුන් මෙහෙකාර සේවයේ යොදා ගැනිමට නොහැකි ආකාරයට ළමා ආරක්ෂක පනත සංශෝධනය කල යුතු බවයි.
මෙහෙකාර සේවයට යොදා ගන්නා වයස් සිමාව වැඩි කල යුතු බවත්, එම නිතිද නොතකා මෙහෙකාර සේවයේ දරුවන් යොදා ගන්නා අයට සහ එම දරුවන් මෙහෙකාර සේවයේ යොදවන දෙමව්පියන්ට දැඩි දඩුවම් ලබාදිමට නිති සම්පාදනය කල යුතු බවයි අශෝක සේපාල මහතා රජයෙන් ඉල්ලා සිටින්නේ.
හැටන් රංජිත් රාජපක්ෂ