රටවල් කිහිපයක් සමග සිරකරුවන් හුවමාරු කර ගැනීමේ ගිවිසුම්වලට කඩිනමින් අත්සන් තැබීමට ශ්‍රී ලංකා පොලිසිය පියවර ගෙන තිබේ.
ඒ අනුව, විදේශ රටවලදී අත්අඩංගුවට ගන්නා මෙරටට අවශ්‍ය පුද්ගලයන් කඩිනමින් දිවයිනට ගෙන්වා ගැනීමට හැකි වන අතර මේ වන විට මෙවැනි ගිවිසුම් කිහිපයක් අත්සන් කර ඇති බව ද වාර්තා වේ.
මෙම ක්‍රමයේ අරමුණ නම් විවිධ අපරාධ සහ මත්ද්‍රව්‍ය ජාවාරම් සිදුකරමින් විදේශ රටවල සැඟව සිටින පුද්ගලයන් මෙම ගිවිසුම් ප්‍රකාරව මෙරටට ගෙන්වා ඔවුන්ට එරෙහිව නීති මගින් කටයුතු කිරීමයි.
වැඩ බලන පොලිස්පති දේශබන්දු තෙන්නකෝන් සඳහන් කළේ, මෙරට විවිධ අපරාධවලට සම්බන්ධ පුද්ගලයන් 42 දෙනෙකු අත්අඩංගුවට ගැනීමට මේ වන විට රතු නිවේදන නිකුත් කර ඇති බව ත් මෙම ගිවිසුම් උපයෝගී කරගෙන ඔවුන් එරටදී අත්අඩංගුවට ගෙන මෙරටට ගෙන්වා ගැනීම කඩිනම් කරන බව ත් ය.
ඩුබායි, ඉන්දියාව සහ යුරෝපීය රටවල රැඳී සිටින මෙවන් අපරාධකරුවන් 42 දෙනෙකු සම්බන්ධයෙන් මෙම රතු නිවේදන නිකුත් කර ඇති බව වාර්ථා වේ.