බටහිර රටවලින් යැපෙන රාජ්‍ය නොවන සංවිධාන ගැත්තන් විසින් සකසන රටට අහිතකර ව්‍යවස්ථාවක් වෙනුවට රටට ජාතියට හිතකර යෝජනා සහිත විකල්ප ව්‍යවස්ථාවක් ඉදිරි දින කිහිපය තුළදී ඉදිරිපත් කිරීමට සූදානම්ව සිටින බව බොදු බල සේනා සංවිධානය පවසනවා. එහි මහ ලේකම් පූජ්‍ය ගලගොඩඅත්තේ ඥාණසාර හිමියන් රජය විසින් යෝජිත නව ව්‍යවස්ථා සංශෝධනය පිළිබදව colombotodayසමග අදහස් දක්වමින් වැඩිදුරටත් මෙසේ පැවසූවා.
“බටහිර රටවල්වලින් යැපෙන NGO බත්බැලයන් විසින් සකසන රටට අහිතකර නව ව්‍යවස්ථාව වෙනුවට මේ රටේ ශිෂ්ටාචාරය ගොඩනගපු ජාතියට හිතකර වන සේ වගේම මේ රටේ සංස්කෘතික හර පද්දතින්වලට අනුකුලවන සේ විකල්ප ව්‍යවස්ථාවක් අපි ඉදිරි දින කීපය තුල රටේ ජනතාවට ඉදිරිපත් කිරීම සදහා කටයුතු කරනවා. ඒ සදහා ආචාර්යවරු වගේම රාජ්‍ය පරිපාලන සේවයේ ඉහල තනතුරු දරා ඇති නිලදාරීන්,නීතිවේදීන් ඇතුළු බොදු බල සේනා බුද්ධි මණ්ඩලය ඊයේ සිට කටයුතු ඇරඹනු ලැබුවා. ඒ වගේම යහපලනයයි කියාගෙන මේ රටේ උරුමක්කාරයින්ට සිදු කරන අකටයුතුකම් පිලිබදව දැනුවත් කරමින් ඉදිරියේදී අපි ගමින් ගමට යනවා අපේ විකල්ප ව්‍යවස්ථාවත් රැගෙන.