ප්‍රබල පාතාල කල්ලි සාමාජිකයෙකු යැයි කියන සංජීව සමරරත්න හෙවත් ගනේමුල්ලේ සංජීව ඇතුළු 11 දෙනෙකු නිදහස් කිරීමට කොළඹ ප්‍රධාන මහේස්ත්‍රාත් අධිකරණය අද නියෝග කළේ ය.
ඒ, නඩුව ප්‍රධාන මහේස්ත්‍රාත් බුද්ධික ශ්‍රී රාගල මහතා හමුවේ අද(12)දින කැඳවූ අවස්ථාවේදීය.
LTTE සංවිධානය විසින් පසුගිය යුද සමයේ උතුරු නැගෙනහිර ප්‍රදේශවල වළ දමා තිබූ, ක්ලේමෝ බෝම්බ, ටී-56 ගිනි අවි ඇතුළු අවි ආයුධ තොගයක් ගොඩගෙන කොළඹ හා තදාසන්න ප්‍රදේශවලට රහසිතගව ප්‍රවාහනය කර, පාතාල කල්ලි සාමාජිකයින්ට අලෙවි කිරිම සහ ඒවා මිලදී ගැනීම ඇතුළු චෝදනා යටතේ, නඩුව පවරා තිබුණි.
මෙතෙක් කළ විමර්ශන අනුව, ඔවුන් 11 දෙනාට එරෙහිව නඩු පැවරීමට තරම් සාක්ෂි ඉදිරිපත් වී නොමැති බවට නීතිපතිවරයා උපදෙස් ලබා දී ඇති බවත්, සෙසු සැකකරුවන් 4 දෙනාට එරෙහිව ඉදිරියේදී නඩු පැවරීමට පියවර ගන්නා බවත්, පෙන්වා දෙමින් කොළඹ අපරාධ කොට්ඨාසය කළ කරුණු දැක්වීම සලකා බැලූ මහේස්ත්‍රාත්වරයා එම නියෝග කළේ ය.
වත්තල ප්‍රදේශයේදී ගිනි අවියක් සමග අත්ඩංගුවට ගත් හිටපු LTTE සාමාජිකයෙකුගෙන් අනාවරණ කරගත් තොරතුරු ඔස්සේ පරීක්ෂණ පැවැත්වූ කොළඹ අපරාධ කොට්ඨාසය ගනේමුල්ල සංජීව ඇතුළු 15 දෙනෙකු අත්අඩංගුවට ගෙන වසර දෙක හමාරකට ආසන්න කාලයක් ඔවුන් රැඳවුම් නියෝග යටතේ සහ රක්ෂිත බන්ධනාගාරගත කරමින් විමර්ශනය සිදු කර තිබේ.