කල්මුනේ සයින්දමරුදු ප්‍රදේශයට නව ප්‍රාදේශීය සභාවක් ඉල්ලා සයින්දමරුදු නගරයේ සියලුම කඩ සාප්පු වසා දමා අද (30දා) සිට දින තුනක් අඛණ්ඩව මහා හර්තාලයක් පැවැත්වීමට මුස්ලිම් පල්ලිවල පාලක මණ්ඩල, උලමාවරු ඇතුළු මුස්ලිම් ආගමික සංවිධාන හා සිවිල් සංවිධාන තීරණය කොට තිබේ.
පසුගිය සිකුරාදා ප්‍රදේශවාසීහු පෙළපාළියකින් ගොස් සයින්දමරුදු ප්‍රදේශයට ප්‍රාදේශීය සභාවක් ලබාදෙන ලෙස දින තුනක අඛණ්ඩ හර්තාලයක් පවත්වන බව සයින්දමරුදු ප්‍රාදේශීය ලේකම්වරයාට ලිපියක් භාරදී තිබේ.
පසුගිය 2015 මහ මැතිවරණ සමයේදී අග්‍රාමාත්‍ය රනිල් වික්‍රමසිංහ මහතා සයින්දමරුදු ප්‍රදේශයට පැමිණ ප්‍රදේශයේ මුස්ලිම් නායකයන්ට සයින්දමරුදු ප්‍රදේශයට ප්‍රාදේශීය සභාවක් ලබාදෙන බවට දුන් පොරොන්දුව සිහිපත් කරන ප්‍රදේශයේ ජනතාව ඇතුළු මුස්ලිම් ආගමික හා සිවිල් සංවිධාන, අද (30දා) සිට දින තුනක කඩ සාප්පු වසා, වයෝවෘද්ධ පිරිස් දින තුනක් නෝම්බි ආගමික වතාවත්වල එළඹී උපවාසයේ යෙදීමටත් මුස්ලිම් දේශපාලනඥයනට දුන් පොරොන්දුව ඉටු කරන ලෙසත් ඉල්ලා මේ හර්තාලයේ යෙදීමට නියමිත බව පැවසේ.
තම ඉල්ලීම්වලට යහපත් ප්‍රතිචාරයක් මේ දින තුන නොලැබුණහොත් අඛණ්ඩ හර්තාලයක් දියත් කරන බව එම සංවිධායකයෝ පවසති.