කහටගස්දිගිලිය, දියමයිලගස්වැව , වැවේ දිය නාමින් සිටි 70 හැවිරිදි පුද්ගලයෙකුට කිඹුලෙකු විසින් පහර දී ඇදගෙන යාමට උත්සහ දැරූ අවස්තාවේදී එම ගම්මානයේ විහාරස්ථානයේ ස්වාමීන් වහන්සේ නමක් විසින් දියට පැන කිඹුලා සමග පොර බදිමින් පහර කෑ පුද්ගලයා බේරාගෙන ඇති බව කහටගස්දිගිලිය පොලිසිය සඳහන් කරයි.
දියමයිලගස්වැව ශ්‍රී ධර්මරාජ විහාරස්තානයේ 30 හැවරිදි, පැල්ලන්දෙනියේ පියනන්ද හිමි සහ 70 හැවිරිදි දියමයිලගස්වැව පදිංචි ජේ.එම් විජේරත්න යන අය දියමයිලගස්වැව වැවේ ඊයේ (07) උදෑසන දිය නාමින් සිට ඇත. ස්වාමීන් වහන්සේ දිය නා අවසන් වී නැවත විහාරස්ථානයට පැමිණීමට සූදානම් වෙමින් සිටියදී වැවේ නාමින් සිටි විජේරත්න මහතා හට මෙම කිඹුල් ප්‍රහාරය එල්ල වී ඇත. කිඹුලා විසින් මෙම පුද්ගලයා ඇදගෙන යමින් සිටියදී මෙම භික්ෂුන් වහන්සේ වැවට පැන කිඹුලා සමග පොර බදිමින් විජේරත්න මහතා එම අවස්තාවේ බෙරා ගෙන ඇත.
අනතුරුව ප්‍රදේශවාසීන්ගේ සහය ඇතුව මෙම පුද්ගලය රෝහල් ගත කර ඇත. සිදුවූ කිඹුල් ප්‍රහාරය හමුවේ විජේරත්න මහතාගේ පාදයට බරපතල තුවාල සිදු වී අනුරාධුපුර ශීක්ෂණ රෝහලේ මේ වන විට ප්‍රථිකාර ලබමින් සිටි. එම අවස්ථාවට මුහුණ දුන් ස්වාමීන් වහන්සේට කිසිදු අනතුරක් මෙහිදී සිදුව නොමැති බව උන්වහන්සේ පැවසීය.
මෙම නිර්භීත ක්‍රියාවෙන් ජීවිතයක් බේරාගැනීම හේතුවෙන් කහටගස්දිගිලිය පොලිස් ස්ථානාධිපති ප්‍රධාන පොලිස් පරික්ෂක ඊ.එස්. අබේසේකර මහතා ඇතුලු පොලිස් කණ්ඩායමක් දියමයිලගස්වැව විහාරස්ථානයට ගොස් ස්වාමීන් වහන්සේ බැහැ දැක හිමි නමට ප්‍රශන්සා කිරීමට ඊයේ (07) දහවල් කටයුතු කළේය.
මැදවච්චය - සජිත් ගයාන් උබේපාල