ඇමැතිවරයකුගේ නම භාවිත කරමින් මැණික් ව්‍යාපාරිකයකුගේ නිවසක් බලෙන් අත්පත් කර ගැනීමට ගිය බව කියන ගම්පොල උප නගරාධිපති ෆුර්කාන් හාජ්ජියාර් අත්අඩංගුවට ගැනීමට දෙහිවල පොලිසිය විමර්ශන ආරම්භ කර තිබේ.
දෙහිවල කවුඩාන අත්තිඩිය ප්‍රදේශයේ පිහිටි රුපියල් කෝටි 25ක් පමණ වටිනා මෙම නිවසේ එම මැණික් ව්‍යාපාරිකයා සහ ඔහුගේ බිරිඳ ජීවත් වෙයි. ව්‍යාපාරිකයාගේ දෑස් නොපෙනෙන බැවින් ඔහු සහායකයකු මාර්ගයෙන් එදිනෙදා කටයුතු කරගෙන ජීවත් වෙයි. ඔහුගෙන් වෙන්ව සිටින බිරිඳ ජීවත්වන්නේ මෙම නිවසෙහි උඩු මහලෙහිය.
මේ අතර පසුගියදා වාහන කිහිපයකින් පැමිණි විස්සකට අධික පිරිසක් නිවෙස් හිමියා එළියට ඇද දමා මෙම නිවස අත්පත් කිරීමට උත්සාහ දරා ඇතැයි ව්‍යාපාරිකයා විසින් දෙහිවල පොලිසිය වෙත කරන ලද පැමිණිල්ලේ දැක්වෙයි.
එම සිද්ධිය සම්බන්ධයෙන් චෝදනාවට ලක්වන්නේ ඉහත කී උප නගරාධිපතිවරයාය. මීට පෙරද විවිධ චෝදනා එල්ල වී ඇති බව පොලිස් ආරංචි මාර්ග සඳහන් කරයි.
මේ සම්බන්ධව ගල්කිස්ස කොට්ඨාස භාර ජ්‍යෙෂ්ඨ පොලිස් අධිකාරි රොහාන් ප්‍රේමරත්නගෙන් විමසූ අවස්ථාවේ දී ඔහු ප්‍රකාශ කළේ සිද්ධියට සම්බන්ධ පුද්ගලයන් අත්අඩංගුවට ගැනීමට දෙහිවල පොලිසියට නියෝග ලබා දී ඇති බවකි.