සුගිය මැතිවරණ සමයේ දී මව්බිම පුවත්පත මගින් පළකරන ලද ලිපි දෙකකින් තමන්ගේ කීර්ති නාමයට හානි වූ බව පවසමින් අමාත්‍ය චම්පික රණවක මහතා විසින් එම පුවත්පතට එරෙහිව රුපියල් බිලියන 1.5ක් ඉල්ලා කොළඹ දිසා අධිකරණයේ ගොනුකර තිබූ නඩුව අද(7) ඉල්ලා අස්කරගෙන ඇතැයි වාර්තා වේ.
එසේම චම්පික රණවක මහතා විසින් කරනලද ප්‍රසිද්ධ ප්‍රකාශ ඔස්සේ මව්බිම පුවත්පතට අගතියක් වී ඇතැයි එම පුවත්පත ද අමාත්‍යවරයාට එරෙහිව හරස් ඉල්ලීමක් කර තිබිණි.
අද අමාත්‍යවරයා වෙනුවෙන් පෙනීසිටි නීතීඥ එම්. සී. ජයරත්න මහතා පවසා සිටියේ තව දුරටත් සිය සේවාදායකයා නඩු කටයුත්ත ඉදිරියට ගෙනයාමට අදහස් නොකරන බවත් එම නිසා නඩුව ඉවත් කර ගැනීමට අධිකරණයේ අවසර පතන බවත් ය.
මේ අනුව මව්බිම පුවත්පත වෙනුවෙන් පෙනීසිටි නීතීඥ රොමේෂ් ද සිල්වා මහතා විසින් පුවත්පත මගින් කළ හරස් ඉල්ලීම ද ඉවත් කරගන්නාබව අධිකරණයට දැන්වීය.