කොවිඩ් -19 වෛරසය හේතුවෙන් මියයන පුද්ගලයන්ගේ මෘත දේහ සම්බන්ධයෙන් ගතයුතු ක්‍රියාමාර්ග සෞඛ්‍ය නීතිවලට යටත්ව ගතයුතු බව මල්වතු අස්ගිරි විහාර පාර්ශ්ව පෙන්වා දෙති.
මල්වතු පාර්ශ්වයේ අනුනායක පුජ්‍ය දිඹුල්කුඹුරේ විමලධම්ම හිමි පැවසුවේ ඊට සෑම ජාතිකයෙකුම හා ආගමිකයෙකුම එකමුතුව සහය පළකළ යුතු බවය.
“ආදාහනය ද? භූමදානය ද කියලා තීරණය ගන්නේ විශේෂඥවරු. ඒ කටයුතුවලට බාධාවක් හිරිහැරයක් නොකළ යුතුයි.”
ආසාදිතයන්ගේ දේහ පිළිබඳ අවසන් කටයුතු සම්බන්ධයෙන් ක්‍රියාකළ යුතු ආකාරය තීරණය කිරීමේ දී ආණ්ඩුව කිසිදු බලපෑමකට යටත් නොවිය යුතු බව අස්ගිරි පාර්ශ්වයේ නියෝජ්‍ය ලේඛකාධිකාරි පුජ්‍ය නාරම්පනාවේ ආනන්ද නා හිමි පවසති.
“ආදාහනයද? භූමදානයද? කියලා ගැටලුවක් මුලින් තිබුණේ නෑ. ඇතැම් දේශපාලකයන් මෑතකාලයේ එය තමන්ගේ වාසිය සඳහා හරවා ගත් ප්‍රශ්නයක් බවට පත්වෙලා. සමාජය තුළ අනවශ්‍ය ප්‍රශ්නයක් නිර්මාණයක කරන්න දරන උත්සහයක් හැටියටයි අපිට පේන්නේ. කොවිඩ් වසංගතය අතරතුර තවත් වසංගතයක් සමාජගත කරන්න එපා කියලා කියන්න ඕනේ. එක නීතියක් මේ සියලු කාර්යයන් සඳහා ක්රියාත්මක කරන්න.”