ශ්‍රී ලංකා මහා බැංකුවේ අධිපති අර්ජුන මහේන්ද්‍රන් මහතා ශ්‍රී ලංකාවේ පුරවැසියකු නොවන නිසාත් ශ්‍රී ලංකා රජයට පක්‌ෂව සහ ව්‍යවස්‌ථාව අනුව කටයුතු කරන බවට දිවුරා පොරොන්දු වී නැති නිසාත් ඔහුට එම තනතුර දැරීමට අයිතියක්‌ නැති බවට සහ සුදුස්‌සකු නොවන බවට තීන්දු කර ඒ අනුව ඔහුගේ තනතුර අහෝසි කරන රිට්‌ ආඥවක්‌ නිකුත් කරන්නැයි ඉල්ලා කැෙෆේ සංවිධානයේ විධායක අධ්‍යක්‍ෂ කීර්ති තෙන්නකෝන් මහතා ඊයේ 20 දා අභියාචනාධිකරණයට පෙත්සමක්‌ද ගොනු කළේය.
මහා භාණ්‌ඩාගාරයේ බැඳුම්කර නිකුත් කිරීමේදී විශාල වංචාවක්‌ සිදුකර ඇති බවට සහ ඔහුගේ පුතාට අයත් මූල්‍ය සමාගමට අයුතු වාසියක්‌ ලබාදෙමින් එමගින් රජයට රුපියල් කෝටි ගණනක පාඩුවක්‌ සිදුකර ඇති බවට අර්ජුන මහේන්ද්‍රන් මහතාට චෝදනා එල්ල වී ඇති බවත් ඔහුගේ හැසිරීම සහ කටයුතු ගැන සලකා බලන විට ඔහු කිසිසේත්ම රටේ යහපාලනයට හවුල් කර ගත යුතු පුද්ගලයකු නොවන බවත් පෙත්සමේ සඳහන් කර ඇත
අර්ජුන මහේන්ද්‍රන් මහතා ශ්‍රී ලංකාවේ මහ බැංකුවේ අධිපති තනතුරට පත්වූයේ 2015.02.27 දායි. ඒ වනවිට ඔහු සිංගප්පූරුවේ වැසියෙකි. ඔහු ශ්‍රී ලංකාවේ උපත ලබා ඇති නමුත් ඔහු ශ්‍රී ලංකාවේ පුරවැසිකම අතහැර සිංගප්පූරුවේ පුරවැසිකම ලබා ගෙන ඇත. එමෙන්ම සිංගප්පූරුවේ ආණ්‌ඩුක්‍රම ව්‍යවස්‌ථාවේ 126 (1) වගන්තියට අනුව එරට රජයට ව්‍යවස්‌ථාවට පක්‌ෂපාතීව කටයුතු කරන බවටද දිවුරා පොරොන්දු වී ඇත. එහෙත් ඔහු මේ වන තෙක්‌ම ශ්‍රී ලංකා රජයට පක්‌ෂපාතිව කටයුතු කරන බවට කළ යුතු දිවුරුම සිදු කර නැති බව පෙත්සමේ වැඩිදුරටත් සඳහන් කර ඇත.