පුත්තලම සිට කොළඹ, ගාල්ල සහ හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල ඉදිරි පැය 24 තුළ ධීවර හා නාවික කටයුතුවල නොයෙදෙන ලෙස කාලගුණ විද්‍යා දෙපාර්තමේන්තුව දැනුම් දෙයි.
එම දෙපාර්තමේන්තුව තද සුළං හා රළු මුහුද පිළිබඳව අනතුරු ඇඟවීම් නිවේදනයක් නිකුත් කරමින් පැවසුවේ, නිරිතදිග මෝසම් තත්ත්වය සක්‍රිය වීම හේතුවෙන් එම මුහුදු ප්‍රදේශවල සුළගේ වේගය විටින් විට පැයට කිලෝමීටර් 60 සිට 70 දක්වා වැඩිවිය හැකි බවයි.
අදාළ අවස්ථාවලදී එම මුහුදු ප්‍රදේශ ඉතා රළුවිය හැකි අතර මුහුදු රළ මිටර් 2.5 සිට 3 යි දක්වා ඉහළ යාමේ හැකියාව ද පවතින බව කාලගුණ විද්‍යා දෙපාර්තමේන්තුව නිවේදනය කළේ ය.
මේ අතර, අද දිනයේ බස්නාහිර සහ සබරගමුව පළාත්වල හා මහනුවර, නුවරඑළිය, ගාල්ල සහ මාතර දිස්ත්‍රික්කවල ඇතැම් ස්ථානවලට මිලිමීටර් 100ට වැඩි තද වැසි ඇතිවිය හැකි බව කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතා පවසයි.