කොවිඩ් පාලනය කිරීම සහ සංචරණ සීමා නිසි පරිදි ක්‍රියාත්මක කිරීම සෞඛ්‍ය අංශවලට තනිව කළ නොහැකි බව සෞඛ්‍ය අමාත්‍යංශයේ නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් මහතා පැවසීය.
කොවිඩ් අර්බුදය හමුවේ මෙරට සෑම පුරවැසියෙක් සහ ආයතනයක්ම වගකීමෙන් කටයුතු නොකළොහොත් රට දැවැන්ත විනාශයකට ගමන් කරනු ඇතැයි ද නියෝජ්‍ය සෞඛ්‍ය සේවා අධ්‍යක්ෂ ජනරාල්වරයා සඳහන් කළේය.
ඔහු මේ බව සදහන් කළේ සෞඛ්‍ය ප්‍රවර්ධන කාර්යංශයේ අද (3) පැවති මාධ්‍ය හමුවක් අමතමිනි.
නිරෝධායන ඇදිරිනීතිය යලි දීර්ඝ කිරීමට තීරණය කර ඇත්තේ කොවිඩ් වසංගතයේ වත්මන් තත්වය අධ්‍යයනය කිරීමෙන් පසුව බවත් මහජනතාවගේ සංචරණයන් සීමා කිරීම සදහා අදාල ආයතන නිවැරදිව සිය යුතුකම් ඉටු කළ යුතු බවත් හේමන්ත හේරත් මහතා කීවේය.
ලෝකයේ නව කොවිඩ් ප්‍රභේදවලට වැට කඩොලු බැඳිය නොහැකි වුවත්, සෞඛ්‍ය මාර්ගෝපදේශ ආරක්ෂා කරමින් වසංගතය පාලනය කළ හැකි බව හෙතෙම සඳහන් කළේය.