බ්‍රිතාන්‍යයේ දෙවන එලිසබෙත් මහ රැජිණගේ දේහය අද (14)දින බකිංහැම් මාලිගයේ සිට වෙස්ට්මිනිස්ටර් ශාලාව වෙත ගෙනැවිත් එහි තැන්පත් කිරීමට නියමිතව තිබේ.
එහිදී මහ රැජිණගේ දේහයට අවසන් ගෞරව දැක්වීම සඳහා මහ ජනතාවට අවස්ථාව ලැබෙන බව එරට මාධ්‍ය වාර්තා කළේය.
ඒ අනුව, එරට වේලාවෙන් අද සවස 5.00 සිට දෙවන එලිසබෙත් මහ රැජිණගේ දේහයට අවසන් ගෞරව දැක්වීමට මහ ජනතාවට අවසර ලැබෙනු ඇත.
මහ රැජිණගේ දේහය බකිංහැම් මාලිගය සිට වෙස්ට්මිනිස්ටර් ශාලාව වෙත රැගෙන ඒමේදී විලියම් කුමරු සහ හැරී කුමරු එය පසුපසින් පැමිණෙන අතර තෙවන චාල්ස් රජු සහ ඔහුගේ සහෝදර සහෝදරියන් තිදෙනා වන ඈන් කුමරිය, ඇන්ඩෲ කුමරු සහ එඩ්වඩ් කුමරු ද දේහය රැගෙන එනු ලබන අවමංගල්‍ය පෙරහැරේ ගමන් කරනු ඇති බව බ්‍රිතාන්‍ය මාධ්‍ය වාර්තා කර තිබේ.