තවත් ඔටෝ ඩීසල් නැවක් ඊයේ (25) රාත්‍රියේ දිවයිනට සේන්දු විය.
විදුලිබල හා බලශක්ති අමාත්‍ය කංචන විජේසේකර මහතා ට්විටර් පණිවුඩයක් නිකුත් කරමින් සදහන් කළේ එහි තොග ගොඩබෑම අද (26)දින ආරම්භ කරන බවයි.
මේ අතර ගෙවීම් ප්‍රමාදයක් නිසා ගොඩබෑම ප්‍රමාද වූ සුපිරි ඩීසල් නැව සඳහා මුදල් ගෙවි‍මෙන් පසු තොග ගොඩබෑම ආරම්භ කළ බව අමාත්‍ය කංචන විජේසේකර මහතා පැවසුවේ ය.
අමාත්‍යවරයා පවසන්නේ දැනට පවතින තොග අනුව ඩීසල් සහ පෙට්‍රල් යම් අනුපාතයකට නිකුත් කරමින් ඇති බවයි.
ඉන්ධන බෙදා හැරීම් සාමාන්‍ය තත්ත්වයට පත්කිරීම සඳහා ඛනිජ තෙල් පර්යන්තය අඛණ්ඩව කටයුතු කරමින් සිටින බව ද අදාළ පණිවුඩයේ සඳහන් වේ.
මේ අතර දිවයිනේ ප්‍රදේශ කිහිපයකම ඉන්ධන පිරවුම්හල්වලින් ඊයේ ඉන්ධන නිකුත් කිරීමක් සිදුවූයේ නැත.
ප්‍රදේශ රැසක ඉන්ධන පිරවුම්හල් අසල මේ හේතුවෙන් දිගු පෝලිම් පැවතියේ ය.