වැට් බදු සංශෝධනයට එරෙහිව ගාල්ලේ ව්‍යාපාරිකයන් පිරිසක් අද (16) පෙරවරුවේ කඩසාප්පු වසා විරෝධතාවක නිරත විය.
මෙම විරෝධතාවය සඳහා ගාල්ල ව්‍යාපාරිකයින් 2000 ක පමණ පිරිසක් එක් ව සිටි අතර ඔවුන් ගාල්ල නගරය හරහා ප්‍රධාන බස් නැවතුම් පොළ වෙත පැමිණ විරෝධතාවය දක්වා ඇත.
ඔවුන් පවසන්නේ මෙම බදු සංශෝධන හරහා පාරිභෝගිකයින්ට මෙන්ම ව්‍යාපාරිකයින්ටද දැඩි අසාධාරණයක් සිදු කර ඇති බවයි.
මෙම ස්ථානයට ස්වදේශ කටයුතු අමාත්‍ය වජිර අබේවර්ධන මහතාද පැමිණ ඇති අතර විරෝධතාකරුවන් අමාත්‍යවරයාට පවසා සිටියේ අසාධාරණ වැට් බදු සංශෝධනය වහා ඉවත් කරන ලෙසයි.
අදාළ ගැටලු සහගත තත්ත්වය පිළිබඳව සාකච්ඡා කිරීමට තමන් බලාපොරොත්තු වෙන බව අමාත්‍යවරයා මෙහිදී පවසා ඇත.
