එක්සත් ජනතා නිදහස් සන්ධානයේ මන්ත්‍රීවරු සිව් දෙනෙක් ආණ්ඩුව සමග එක්වීමට සූදානමින් සිටින බව වාර්තා වේ. නව රජයේ මංගල අයවැයට පක්ෂව ඡන්දය ප්‍රකාශ කරමින් මොවුන් සිව් දෙනා ආණ්ඩුවට එකතු වීමට සූදානමින් සිටින අතර ඉන් එක් අයෙක් ‘මහින්ද සමග නැගිටිමු“ සංවිධානයේ ඉදිරිපෙළ ක්‍රියාකාරිකයෙකු බවද පැවසේ. ආණ්ඩුවට එකතුවීම සම්බන්දයෙන් මෙම මන්ත්‍රීවරුන් සිව් දෙනා ජාත්‍යන්තර වෙළද කටයුතු අමාත්‍ය මලික් සමරවික්‍රම මහතා සමග සාකච්ඡා වට දෙකක් පවත්වා තිබේ.
මේ සම්බන්ධයෙන් මලික් සමරවික්‍රම මහතා අග්‍රාමාත්‍ය රනිල් වික්‍රමසිංහ මහතාට දැනුම් දුන් අවස්ථාවේ දී ජනාධිපති මෛත්‍රිපාල සිරිසේන මහතාගේ එකඟත්වය මත රජයට එක් වීම සම්බන්ධයෙන් තමාගේ විරුද්ධත්වයක් නැතැයි දැනුම් දී තිබේ.
මින් එක් මන්ත්‍රිවරයකුට කැබිනට් ඇමැති ධුරයක් ලබා දීමට ඉඩ ඇතැයි වාර්තා වන අතර එය ජාතික ආණ්ඩුව පිහිටුවිමේ දී එක්සත් ජාතික පක්ෂය සහ ශ්‍රි ලංකා නිදහස් පක්ෂය අතර අත්සන් කෙරුණු අවබෝධතා ගිවිසුම අනුව ශ්‍රි ලංකා නිදහස් පක්ෂයට ලැබුණු අමාත්‍ය කෝටාවෙන් ලැබෙන බවත් වාර්තා වේ.
රජයට එක් වීමට නියමිත මන්ත්‍රිවරුන් අතරින් තවත් අයකුට නියෝජ්‍ය අමාත්‍ය ධුරයක් ද තවත් අයකුට දිස්ත්‍රික් සංවර්ධන කමිටුවේ සම සභාපති තනතුරක් ද ලැබීමට නියමිත බව ද විශ්වාසදායක ආරංචි මාර්ග සඳහන් කරයි.
රජයට එක් වීමට පෙර මෙම මන්ත්‍රීවරුන් සිවු දෙනා ජනාධිපති මෛත්‍රිපාල සිරිසේන සහ අග්‍රාමාත්‍ය රනිල් වික්‍රමසිංහ මහතා හමුවීමට නියමිතය.