යාපනය විශ්ව විද්‍යාලයේ පසුගිය දා ඇතිවූ සිද්ධියෙන් අනතුරුව විශ්වවිද්‍යාලයේ පීඨ කිහිපයක් මේවන විට ආරම්භ වී ඇතත් ප්‍රමාණවත් සිංහල ශිෂ්‍යයන් පිරිසක් මෙතෙක් අධ්‍යයන කටයුතු සදහා විශ්වවිද්‍යාලය පැමිණ නොමැති හෙයින් විභාග හා දේශන කටයුතු සිදුකරගෙන යාමට නොහැති තත්ත්වයක් උද්ගතව ඇතැයි උපකුලපති මහාචාර්ය වසන්ති අර්සරත්නම් මහත්මිය පවසයි.
දැනුම් දිය හැකි සෑම අයුරකින්ම සිංහල සිසුන්ට විශ්වවිද්‍යාලයට පැමිණෙන ලෙස දන්වා ඇතත් මේ දක්වාත් සැලකිය යුතු සිසුන් පිරිසක් විශ්ව විද්‍යාලයට පැමිණ නැත.
මේ වන විට විශ්වවිද්‍යාලය තුළ ආරක්ෂාව තහවුරු කර ඇති බවට පාලනාධිකාරිය පවසා ඇති බව සදහන් කරන උපකුලපතිනිය පෙන්වා දෙන්නේ විශ්වවිද්‍යාලය තුළ සිංහල සිසුන්ට කිසිදු ගැටළුවක් නොමැති බවයි.
මේ අතර වහාම ක්‍රියාත්මක වන පරිදි පේරාදෙණිය විශ්වවිද්‍යාලයේ සිසුන් 17 දෙනෙකුගේ පංති තහනම් කර තිබේ. විශ්වවිද්‍යාලයේ සිසුන් පිරිසකට පහරදීමේ සිද්ධියක් මුල්කරගනිමින් මෙම පංති තහනම සිදු කර ඇති බව එහි ප්‍රධාන විනය ආරක්ෂක නිළධාරීවරයා සදහන් කළේය.
මූලාශ්‍රය – අද දෙරණ