හැටන් කලාප අධ්‍යාපන කාර්යාලය යටතේ පාලනය වන නොර්වුඩ් සෙන් ජෝන් ටිලර් දමිළ මහා විද්‍යාලයේ පන්ති කාමරයකට කිසියම් පිරිසක් විසින් ගිනි තබා විනාශ කිරීමට විරෝධය පළකරමින් අද (06) දින එම පාසලේ ගුරුවරු ඉගැන්වීම් කටයුතු වලින් ඉවත් වීමට පියවර ගෙන ඇත.
පසුගිය මැයි මස 26 වැනිදා රාත්‍රියේදී කිසියම් පිරිසක් විසින් 11 වසර පන්ති කාමරයකට ඇතුළු වී ඒ තුළ මත්පැන් පානය කිරීමෙන් පසුව එම පන්ති කාමරයේ තිබූ අල්මාරියක් ගිනි තබා විනාශ කර ඇති බවට තොරතුරු වාර්තා වෙයි.
ගින්නෙන් අල්මාරිය තුළ තිබූ ළමුන්ගේ වාර්තා පොත් විනාශ වී ඇති අතර පාසලේ ස්ථාන කිහිපයක ජනෙල් වීදුරු බිඳ දමා ඇති බවට ගුරුවරු චෝදනා කරති.
නොර්වුඩ් පොලිසියේ ස්ථානාධිපතිවරයා සිද්ධිය සැල වු වහාම විදුහලට පැමිණ විදුහල්පතිවරයා සහ අචාර්ය මණ්ඩලය සමග සාකච්ඡා කිරිමෙන් අනතුරුව එම පාසලේ විදුහල්පතිවරයා සිද්ධිය සම්බන්ධයෙන් නොර්වුඩ් පොලිසියට පැමිණිල්ලක් කිරිමට පියවර ගෙන ඇත.
එම පාසලේ අපොස සාමාන්‍ය පෙළ දක්වා ඉගැන්විම් කටයුතු සිදු කරන අතර ළමුන් 700 පමණ එම පාසලේ අධ්‍යාපනය ලබයි.