රුසියානු ජනාධිපති ව්ලැදිමීර් පුටින් විසින් හිටපු ජනපති මෛත්‍රීපාල සිරිසේනට ලිපියක් එවනු ලැබ ඇත.
මෙම ලිපිය රුසියානු තානාපති යුරි මැටෙරි විසින් ඊයේ(21)දින හිටපු ජනාධිපතිවරයාගේ කොළඹ පිහිටි නිල නිවසට පැමිණ භාර දෙනු ලැබ තිබේ.
එරොෆ්ලොට් ගුවන් යානය පිළිබඳව ඇතිවී තිබුණු මතභේදාත්මක තත්ත්වය සමතයට පත් කිරීමේ අරමුණින් හිටපු ජනාධිපතිවරයා රුසියානු ජනාධිපති ව්ලැදිමීර් පුටින්ට ජුනි මස 05 වන දින ලිපියක් යොමු කරන ලදි. එම ලිපියෙන් ඔහු ඉල්ලා සිටියේ ශ්‍රී ලංකාව දැනට වැටී තිබෙන අර්බුදය හමුවේ රුසියානු සංචාරකයන් මෙරටට පැමිණීමට බහුලව භාවිතා කරන රුසියානු ජාතික ගුවන් සේවාව මෙරටට පැමිණීම නොවළක්වන ලෙසත්. එසේ වුවහොත් එය ශ්‍රී ලංකාවේ සංචාරක කර්මාන්තයට සහ විදේශ විනිමයට මරු පහරක් වන බැවින් මේ පිළිබඳව අවධානය යොමු කරන ලෙසත් ය.
රුසියානු ජනාධිපතිවරයා ඉහත ලිපිය එවා ඇත්තේ ඊට පිළිතුරු වශයෙනි. එම ලිපියේ අන්තර්ගත කාරණා පිළිබඳව ඉතා ඉක්මනින් ජනාධිපති ගෝඨාභය රාජපක්ෂ සමඟ සාකච්ඡා කොට සාධනීය පිළිතුරක් රුසියානු රජය අපේක්ෂා කරන ආකාරයට ලබා දීමට මැදිහත් වන බව හිටපු ජනාධීපතිවරයා තානාපතිවරයාට දන්වා ඇත.