යතුරුපැදි සොරකම්කර අංක තහඩු සහ වර්ණය වෙනස්කර අලෙවි කරන ජාවාරමක් වැල්ලවාය පොලීසිය විසින් අනාවරණය කරගෙන තිබේ.
එම ජාවාරම සිදුකළ සැකකරුවන් දෙදෙනා වැල්ලවාය, නුගයාය ප්‍රදේශයේදී පොලීසිය විසින් අත්අඩංගුවට ගෙන ඇත.
ඔවුන් වයස අවුරුදු 27 සහ 54 යන වයස්වල පසුවන්නන් ය.
අදාළ සැකකරුවන් විසින් විවිධ ප්‍රදේශවලින් යතුරුපැදි සොරකම්කර පසුව සූක්ෂම ලෙස එම යතුරුපැදිවල අංක තහඩු සහ වර්ණය වෙනස්කර අලෙවිකර ඇති බවට පොලිස් මූලික විමර්ශන මගින් අනාවරණය වී තිබේ.
සැකකරුවන් සන්තකයේ තිබී එලෙස සොරකම්කර වර්ණය සහ අංක තහඩු වෙනස්කළ යතුරුපැදි 5ක් පොලීසිය විසින් සොයාගෙන ඇත.
සැකකරුවන් දීර්ඝ කාලයක සිට එම ජාවාරමේ නිරත වී ඇති බවද පොලීසිය පවසයි.
අදාළ සැකකරුවන් වැල්ලවාය මහෙස්ත්‍රාත් අධිකරණයට ඉදිරිපත් කිරීමට නියමිත අතර සිද්ධිය සම්බන්ධයෙන් වැල්ලවාය පොලීසිය වැඩිදුර විමර්ශන සිදුකරයි.