පසුගිය දිනවල පැවති අධික වර්ෂාවත් සමග එළවළු මිල ශීඝ්‍රයෙන් ඉහළ ගොස් ඇති බව එළවළු වෙළෙඳුන් පවසයි. ඉල්ලුමට සරිලන සැපයුමක් නොමැති වීමත්, පැවති වර්ෂාවත් සමගම දඹුල්ල ප්‍රදේශයේ එළවළු වගාව විනාශ වීමත් මෙයට හේතුව බව වෙළෙඳසැල් හිමියන් පැවසූහ.
මේ දිනවල නුවරඑළිය, වැලිමඩ, බණ්ඩාරවෙල සහ වැල්ලවාය යන ප්‍රදේශවලින් වෙළෙඳ පොළට අවශ්‍ය එළවළු සීමිත ප්‍රමාණයක් ලැබෙන බවයි වෙළෙඳුන් පවසන්නේ.
සෑම එළවළු වර්ගයකම කිලෝවක් රුපියල් 160 සිට ඉහළට අලෙවි වන අතර, බෝංචි කිලෝවක් රුපියල් 270කට, මාළුමිරිස් කිලෝවක් රුපියල් 280කට සහ කැරට් කිලෝවක් රුපියල් 200කට අලෙවි වේ. මෙම ඉහළ එළවළු මිල ගණන් යටතේ දෙල් ගෙඩියක් රුපියල් 130ක්, මඤ්ඤාක්කා කිලෝවක් රුපියල් 70ක් වශයෙන් සිල්ලර මිලට අලෙවි වේ. තත්කාලි කිලෝවක් රුපියල් 200කට අලෙවි වන අතර, පතෝල, වැටකොළු සහ වම්බටු කිලෝවක් රුපියල් 160කට මේ දිනවල අලෙවි කරනු ලැබේ.