සිය රැකියා කාල සීමාව නිමකර කොරියාවේ සිට මෙරටට පැමිණෙන ශ්‍රී ලාංකික ශ්‍රමිකයින් සඳහා විශේෂ වැඩසටහන් කිහිපයක් සකස් කරන බව විදේශ රැකියා අමාත්‍ය තලතා අතුකෝරාල මහත්මිය පවසයි.
අමාත්‍යවරිය සඳහන් කළේ විදේශ රැකියා අමාත්‍යංශයේ ප්‍රධානත්වයෙන් මුදල් අමාත්‍යංශය සහ විදේශ කටයුතු අමාත්‍යංශය එක්ව එම වැඩසටහන් සකස් කිරීමට අපේක්ෂා කරන බවයි.
ඒ අනුව යළි දිවයිනට පැමිණෙන ශ්‍රමිකයින්ට ඔවුන් උපයාගෙන එන මුදල් නිසි ලෙස ආයෝජනය කරන ආකාරය, ආයෝජන අවස්ථා පිළිබඳව දැනුවත් කිරීමට කටයුතු කරන බව තලතා අතුකෝරාල අමාත්‍යවරිය සඳහන් කළාය.
වර්තමානයේ ශ්‍රී ලාංකිකයින් 28,000ක් පමණ දකුණු කොරියාවේ රැකියාවල නිරත වන අතර 2014 වසරට සාපේක්ෂව 2015 වසරේ රැකියා සඳහා කොරියාව බලා පිටත් වූ ශ්‍රී ලාංකිකයින් ප්‍රමාණය සියයට 14කින් ඉහළ ගොස් ඇති බව සඳහන්ය.