මහනුවර, තෙල්දෙණිය ප්‍රදේශයේ ගැටුම්වලට අනුබල දුන් පිරිස් අතර රජයට සම්බන්ධ ප්‍රබල චරිත සිටින බවට තොරතුරු ලැබී ඇති බවත්, සුදු බැටළුවන් අතර කළු බැටළුවන්ද සිටින බවත් හිටපු මුදල් අමාත්‍ය සහ පාර්ලිමේන්තු මන්ත්‍රී රවි කරුණානායක මහතා පවසා සිටියේය.
අමාත්‍යවරයා මෙසේ පවසා සිටියේ පසුගිය 12දා කොළඹ, තොටළඟ එක්සත් ජාතික පක්ෂ කාර්යාලයේ පැවති විශේෂ මාධ්‍ය හමුවකදීය. එහිදී වැඩිදුරටත් අදහස් දැක්වූ අමාත්‍යවරයා,
“උතුරු කොළඹ වැනි ආසනයක ජාතීන් හා ආගම් අතර පවතින සංහිඳියාව රටටම ආදර්ශයක්. සමාජ මාධ්‍ය වගකීම් සහිතව කටයුතු කරන්නේ නම් කිසිවෙකු භීතියට පත්වීමේ අවශ්‍යතාවක් නැහැ. පසුගිය දින කිහිපයේ මහනුවර ඇති වූ සිද්ධිවලට පොලීසිය මුළුමනින්ම වගකිව යුතුයි. ඒ වගේම, ජාතීන් අතර ආගම් අතර විරසකවීම් උත්සන්න කිරීමට සමාජ මාධ්‍යද වගකිව යුතුයි. සමාජ මාධ්‍ය පාලනය කිරීමත් සමග ගැටුම්කාරී තත්ත්වය පාලනය වූ ආකාරය රටම තේරුම් ගත් කාරණයක් වුණා. ඒ වගේම, මහනුවර ගැටුම්වලට අනුබල දුන් පිරිස් අතර රජයේ ඇතැමුන් සිටින බවට තොරතුරු ලැබී තිබෙනවා. කොළඹ නගරයේ මෙවැනි ගැටුම් නිර්මාණය කිරීමට ඇතැම් දේශපාලඥයන් උත්සාහ දැරුවත්, එවැනි අවස්ථා පාලනය කිරීමට එක්සත් ජාතික පක්ෂය ක්‍රියා කළා.” යැයි පවසා සිටියේය.
මෙහිදී මාධ්‍යවේදියෙකු නැඟූ ප්‍රශ්නයකට පිළිතුරු දෙමින් රවි කරුණානායක මහතා කියා සිටියේ, තෙල්දෙණිය ප්‍රදේශයේ ගැටුම් පිටුපස රජයට සම්බන්ධ ප්‍රබල චරිත සිටින බවට තොරතුරු ලැබී ඇති බවත්, සුදු බැටළුවන් අතර කළු බැටළුවන්ද සිටින බවත්ය.