උතුරු ඉන්දියාවේ ‘හර්යානා’ ප්‍රාන්තයේ ගමකට ගුවනින් අයිස් ගුලියක් ඇද වැටීමෙන් ඇතිවූ සිදුවීමක් පිළිබදව විදෙස් මාධ්‍ය වාර්තා කර තිබේ. ඉන්දීය බලධාරීන් පවසන්නේ මෙය ගුවන් යානයක වැසිකිළියකින් නිකුත් වූ මිනිස් අපද්‍රව්‍ය තොගයක් බවයි.
කිලෝග්‍රෑම් 10-12 අතර ප්‍රමාණයක් බරැති එම අයිස් කුට්ටිය පසුගිය සෙනසුරාදා විශාල ශබ්දයක් ඇති කරමින් හර්යානාහි ‘ෆෂිල්පූර් බද්ලි’ නම් ගම්මානයට වැටී ඇත. එම ද්‍රව්‍ය වෙනත් ලෝකයකින් කඩා වැටුණු වස්තුවක් යැයි ගම්වැසියන් සලකා ඇති අතර පුද පූජා පැවැත්වීමටද උත්සාහ කර ඇත.
ගුවන් ගමන්වලදී මිනිස් අපද්‍රව්‍ය ගබඩා වීමට යානාවන්හි විශේෂ ටැංකි නිමවා ඇති අතර, ඒවා ඉවත ලනු ලැබීම කෙරෙන්නේ ගුවන් යානා ගොඩ බෑමෙන් අනතුරුවය.
එහෙත් ඇතැම් අවස්ථාවල ගුවනේ දී එවැනි ටැංකිවලින් මිනිස් අපද්‍රව්‍ය කාන්දු විය හැකි බව ජාත්‍යන්තර ගුවන් ගමන් බලධාරීහු පිළිගනිති.