ඉන්ධන බෙදාහැරීමේ කටයුතු නිරීක්ෂණය කිරීම සඳහා යුද හමුදා නිලධාරින් රට පුරා යොදවා ඇති බව යුද හමුදාපති ජෙනරාල් ශවේන්ද්‍ර සිල්වා මහතා පවසයි.
ප්‍රධාන ඉන්ධන මධ්‍යස්ථානවල සිට පිටත් වන ඉන්ධන බවුසර් ඉන්ධන පිරවුම්හල් වෙත නියම ආකාරයට පැමිණෙන්නේ දැයි සොයා බැලීම සඳහා මෙම නිරීක්ෂණ වැඩපිළිවෙළ ආරම්භ කළ බවද යුද හමුදාපතිවරයා සඳහන් කර සිටි.
යුද හමුදාව මෙම වැඩපිළිවෙල ක්‍රියාත්මක කර ඇත්තේ ජනාධිපති ගෝඨාභය රාජපක්ෂ මහතාගේ විශේෂ උපදෙස් අනුවය.
ඒ අනුව ඉන්ධන බවුසරයක්ම ප්‍රධාන ඉන්ධන ගබඩාවලින් පිටත්වූ වහාම අදාල ප්‍රදේශයන්හි යුද හමුදා ආඥාපතිවරයාට දැනුම් දෙනු ලැබේ. ඒ අනුව ආඥාපතිවරයා විසින් නිරීක්ෂණ කටයුතු සඳහා හමුදා නිලධාරීහු කණ්ඩායම් අදාල ප්‍රදේශ වලට හෝ මාර්ගවලට යෙදවෙති.
කොලොන්නාව, මුතුරාජවෙල ප්‍රධාන ඉන්ධන ගබඩා සංකීර්ණවලට අමතරව ඉන්ධන බෙදාහැරීමේ ඩිපෝ 12ක් රටපුරා ක්‍රියාත්මක වේ.
මේ අතර ඉන්ධන බෙදාහරින දුම්රියවල ආරක්ෂාව සඳහා යුද හමුදා සහ ගුවන් හමුදා නිලධාරීන් යොදවා ඇතැයි ශවේන්ද්‍ර සිල්වා මහතා වැඩිදුරටත් සදහන් කරයි.