මේ දිනවල ඇද හැලෙමින් පවතින අධික වර්ෂාව හේතුවෙන් මේ වනවිට ප්‍රධාන ජලාශ කිහිපයක වාන් දොරටු විවෘත කර ඇතැයි වාරිමාර්ග දෙපාර්තමේන්තුවේ, වාර්මාර්ග අධ්‍යක්ෂ, ජල කළමනාකරණ ඉංජිනේරු ඩී අබේසිරිවර්ධන පවසයි.
වර්ෂාපතනයේ යම් අඩුවීමක් අද දිනයේ වාර්තා වුවත් වැසි තත්ත්වය ඉදිරි පැය 48ක් දක්වා තවදුරටත් පවතින බවට කාලගුණ විද්‍යා දෙපාර්තමේන්තුව නිවේදනය කරයි.
ජලාශවලට ලැබෙමින් තිබෙන වර්ෂාව සමග කුරුණෑගල දිස්ත්‍රික්කයේ දැදුරු ඔයෙ හි වාන් දොරටු දෙකක් අඩිය බැගින් විවෘත කර ඇත.
අනුරාධපුර දිස්ත්‍රික්කයේ රාජාංගනය ජලාශය වාන් දොරටු 4ක් අඩි දෙක බැගින් විවෘත කර ඇති අතර අංගමුව ජලාශය වාන් දොරටු දෙකක් අඩි බැගින් විවෘත කර තිබේ.
අම්පාර දිස්ත්‍රික්කයේ රඹකැන් ඔය ජලාශය වාන් දොරටු දෙකක් අඟල් 4 බැගින් විවෘත කර ඇත.
මඩකලපුව දිස්ත්‍රික්කයේ උන්නිච්චි ජලාශයේ වාන් දොරටු එකක් අඟල් 6 බැගින් විවෘත කළ බව ද ඩී අබේසිරිවර්ධන මහතා පවසයි.
සමස්තයක් ලෙස දින දෙකක් තුළ ජලාශවල ජල මට්ටම සියයට 4කින් ඉහළ ගොස් ඇතැයි ද පැවසු ඒ මහතා, අද වනවිට ජල ධාරිතාව 70%ක් දක්වා වැඩිවී ඇතැයි ද කියා සිටි.
මේ අතර ජලාශ, ගංගා, ඇළ දොළ භාවිතයේ දී ජනතාවට වඩාත් සැලකිලිමත්වන ලෙස ද වාරි මාර්ග දෙපාර්තමේන්තුව දැනුම්දෙයි.