අපවත්වී වදාළ යාපනය නාග විහාරධිපති උතුරු පළාත් ප්‍රධාන සංඝනායක මීගහජඳුරේ ඥානරතන නාහිමියන්ගේ දේහය පිළිබඳ ආදාහන පූජෝත්සවය අද පස්වරුවේ යාපනය කොටුව අසල පිහිටි මහජන ක්‍රිඩාංගණයේදී පැවැත්වීමට එරෙහිව ගොනුකළ පෙත්සම යාපනය මහෙස්ත්‍රාත් අධිකරණය ප්‍රතික්ෂේප කර තිබේ.
මෙම දේහය ආදාහනය කරන ස්ථානයේදී දමිළ විශ්ලේෂණ සමුළුවේදී ඝාතනය කරන ලද සාමාජිකයන් සිහිවීම පිණිස ස්මාරකයක් ඉදිකර ඇති අතර එම ස්ථානයේ කෝවිලක්ද පිහිටා තිබෙන බව පවසමින් ප්‍රදේශයේ සිවිල් සංවිධාන විසින් විරෝධය පළ කර තිබිණි.
කෝවිල සහ ස්මාරකය පවතින එම ස්ථානයේ ආදාහන පුජෝත්සවය නොපවත්වන ලෙස ප්‍රදේශයේ සිවිල් සංවිධාන විසින් යාපනය නගර සභාවට හා උතුරු පළාත් ප්‍රධාන අමාත්‍ය සී.වී විග්නේශ්වරන් මහතාට ලිපියක් යවා තිබූ අතර යාපනය මහෙස්ත්‍රාත් අධිකරණයටද පෙත්සමක් ඉදිරිපත් කර තිබේ.
කෙසේ නමුත් පෙත්සම අද විභාගයටගත් අවස්ථාවේදී යාපනය මහෙස්ත්‍රාත් අධිකරණයේ විනිසුරු එස්.සදීශ්කරන් මහතා විසින් එම පෙත්සම ප්‍රතික්ෂේප කර එම ස්ථානයේම ආදාහන පූජෝත්සවය පවත්වන ලෙස නියෝග කර තිබේ.
Adaderana