දෙමළ ජාතික සන්ධානයට එරෙහිව කටයුතු කළ හැකි නව දෙමළ දේශපාලන පක්ෂයක් අලුතින් පිහිටුවන බව දෙමළ ජාතික සන්ධානයෙන් ඉවත්වූ ඊ.පී.ආර්.එල්.එෆ්. සංවිධානයේ නායක සුරේෂ් ප්‍රේමචන්ද්‍රන් මහතා පවසයි.
අලුතින් පිහිටුවනු ලබන දෙමළ දේශපාලන පක්‌ෂය ඉතා ක්‍රියාකාරී පක්ෂයක් ලෙස පවත්වාගෙන යාමට හැකි දේශපාලන වාතාවරණයක්‌ මේ වන විට උතුරු පළාතේ නිර්මාණය වී ඇති බව පෙන්වා දුන් ඒ මහතා තම නව පක්‌ෂය නැගෙනහිර පළාත් තුළ ද ක්‍රියාත්මක කරන බව කියා සිටියේය.
දැනට දෙමළ ජාතික සන්ධානයට ඉතිරි වී ඇති දේශපාලන පක්‌ෂ තුන අතරින් යාන්තමට හෝ ජීවයක්‌ ඇත්තේ ඉලංකෙයි තමිල් අරසු කච්චි පක්‌ෂයට පමණක් බව පැවසූ සුරේෂ් ප්‍රේමචන්ද්‍රන් මහතා එම පක්‌ෂය ද කටයුතු කරන්නේ උතුරේ දෙමළ ජනතාවට අවශ්‍ය අන්දමට නොව ඉන්දියාවේ ප්‍රබල දේශපාලනඥයින්ට අවශ්‍ය අන්දමට බවද ඊයේ 11 යාපනයේදී මාධ්‍ය අමතමින් ප්‍රකාශ කොට තිබේ.
දෙමළ ජාතික සන්ධානය බිදී යෑම වළක්වා ගැනීම සදහා උතුරේ කිතුණු පූජකවරුන් ඇතුළු පාර්ශව ගණනාවක් පසුගිය දින කිහිපයේදී දැඩි උත්සාහයක නිරත විය.