එළැඹෙන දෙසැම්බර් මාසයේදී පැවැත්වෙන ලිබියානු ජනාධිපතිවරණය සහ පාර්ලිමේන්තු මැතිවරණ නිරීක්ෂණය සඳහා මෙහෙයුම් කණ්ඩායමක් යොමු කිරීම පිළිබඳ සලකා බලන ලෙස ලිබියාව ශ්‍රී ලංකාවෙන් ඉල්ලීමක් කර තිබේ.
විදේශ කටයුතු අමාත්‍යංශය පැවසුවේ, ලිබියානු තානාපති කාර්යාලයේ කාර්ය භාර නිලධාරී ඒ.එම්. මුෆ්තා මහතා පසුගිය පළමු වැනිදා විදේශ අමාත්‍ය ජී.එල්. පීරිස් මහතා හමුවූ අවස්ථාවේ මෙම ඉල්ලීම සිදු කර ඇති බවයි.
ප්‍රජාතන්ත්‍රවාදී ක්‍රියාවලිය තවදුරටත් ශක්තිමත් කිරීම සඳහා ලිබියාව දරන ප්‍රයත්නයන්ට ශ්‍රී ලංකාව සහයෝගය දක්වන බවත් මෙම ඉල්ලීම පිළිබඳව සලකා බලන බවත් එහිදී විදේශ අමාත්‍යවරයා සඳහන් කර තිබේ.
මේ අතර ලිබියාවේ වර්තමාන තත්ත්වය සහ විශේෂයෙන් 2021 මාර්තු මාසයේ සිට බලයේ සිටින අතුරු භාරකාර රජයේ කාර්යභාරය පිළිබඳව ලිබියානු කාර්ය භාර නිලධාරිවරයා මෙම හමුවේදී කරුණු පැහැදිලි කර තිබේ.
ලිබියාව සමග තේ, මැණික් හා ස්වර්ණාභරණ සහ සංචාරක කටයුතු ක්ෂේත්‍රයන්හි ශ්‍රී ලංකාවේ වෙළඳ සබඳතා වැඩි දියුණු කිරීම සම්බන්ධයෙන් සාකච්ඡා අඛණ්ඩව පවත්වාගෙන යාමට ද මෙම හමුවේදී එකඟතාව පළ වී ඇත.