පළාත් සභාවලට බලය ඕනෑ කියා කෑ ගසන අයට අද උතුරු පළාත් සභාවේ බලය තිබියදීත් වැඩ කිරීමට නොහැකි වී ඇති බවත්, උතුරු පළාත් සභා හැර සෙසු පළාත් සභාවල සිදු කරන වැඩ ප‍්‍රමාණය අද උතුරු පළාත් සභාවේ මහඇමති විග්නේෂ්වරම්ට සිදු කර ගත නොහැකි බවත් අමාත්‍ය පාඨලී චම්පික රණවක මහතා පවසයි.
යෝජිත ආණ්ඩුක‍්‍රම ව්‍යවස්ථා කෙටුම් පතට ජාතික හෙළ උරුමයේ නිරික්ෂණ සම්බන්ධයෙන් අදහස් පළ කරමින් ඊයේ(03) පැවති මාධ්‍ය හමුවකට එක් වෙමින් අමාත්‍යවරයා මෙම අදහස් පළ කළේය.
නව ආණ්ඩුක‍්‍රම ව්‍යවස්ථා කෙටුම්පත සම්බන්ධයෙන් විවිධ මතිමතාන්තර ඉදිරිපත්ව ඇති බවත් රජය 2015 ජනවාරි 08 පත්වන විට මැතිවරණ පොරොන්දුවක් ලෙස නව ආණ්ඩුක‍්‍රම ව්‍යවස්ථාවක් යෝජනා කර සිටි බවත් පැවසු අමාත්‍යවරයා, මෙම කෙටුම්පත සකස් කිරීම සඳහා පාර්ලිමේන්තුවේ සිටින 225 දෙනාම සහභාගි වු බවද කියා සිටියේය.
එහිදී පාර්ලිමේන්තුවේ කමිටු වාර්තා 06ක් දැනට ඉදිරිපත් වී ඇති බවත්, එය ලියවිල්ලක් පමණක් වන අතර පාර්ලිමේන්තුවට ව්‍යවස්ථාවක් මුලින්ම ඉදිරිපත් කළේ 2000 දී හිටපු ජනාධිපතිනිය විසින් අතර එය ද පරාජයට පත් වූ බව අමාත්‍යවරයා මෙහිදී පැවසීය.
වැඩිදුරටත් අදහස් දැක්වු අමාත්‍යවරයා මෙසේ ද සදහන් කළේය.
”ජාතික හෙළ උරුමය ලෙස නව ආණ්ඩුක‍්‍රම ව්‍යවස්ථාවක් ඉදිරිපත් කරන්නේ නම් රට තුළ ස්ථාවරභාවයක් තිබිය යුතුය. එහිදී ප‍්‍රජාතන්ත‍්‍රවාදී ස්ථාවරභාවය, ආර්ථික ස්ථාවරභාවය, පාරිසරික ස්ථාවරභාවය, දේශපාලන ස්ථාවරභාවය, රටේ ඒකීයස්ථාවරභාවය ආදිය රැකිය යුතුය.
එසේ නොමැතිව 1978 ගෙන එන ලද ආණ්ඩුක‍්‍රම ව්‍යවස්ථාව හෝ 1988 පළාත් සභා ක‍්‍රමය හඳුන්වාදුන් ආකාරයට හෝ මහින්ද රාජපක්ෂ 19 ආණ්ඩුක‍්‍රමයට ව්‍යවස්ථා සම්මත ආකාරයට නොකළ යුතුය.”