මහජන මුදල් ආධාරවලින් ගෙන්වන පෙට් ස්කෑන් යන්ත්‍රය ලබන නොවැම්බර් මාසය වන විට මහරගම අපේක්ෂා රෝහලේ ස්ථාපිත කළ හැකි යැයි සෞඛ්‍ය සේවා අධ්‍යක්ෂ ජනරාල් වෛද්‍ය ජයසුන්දර බණ්ඩාර මහතා සඳහන් කරයි.
එය රෝහලේ ස්ථාපිත කිරීම සඳහා සෑදිය යුතු විශේෂ කුටිය මේ වන විටත් සාදා නොමැතිකම පෙට් ස්කෑන් යන්ත්‍රය ගෙන ඒම ප්‍රමාද වීමට හේතුවක් වී ඇතැයිද, පෙට් ස්කෑන් යන්ත්‍රය මෙරටට ගෙන ආවද එය ක්‍රියාත්මක කරවීම සඳහා අවශ්‍ය රසායනික ද්‍රව්‍ය අපට ආසන්න රටකින් ගෙන්වා ගත යුතු බැවින් ඒ පිළිබඳව ඇති හැකියාව පිළිබඳව සොයා බැලීමට බලාපොරොත්තු වන බවද හෙතෙම පසුගියදා සෞඛ්‍ය අධ්‍යාපන කාර්යාංශයේ පැවැති මාධ්‍ය හමුවේදී සඳහන් කළේය.
පෙට් ස්කෑනරය මිලදී ගැනීම සදහා අවශ්‍ය වන කෝටි 20ක මුදල මහජන ආධාරවලින් සපුරා දුන්නේ පසුගිය වසරේ ජූනි මාසයේය.