පළිබෝධනාශක යළි ආනයනය කිරීමට කෘෂිකර්ම අමාත්‍යාංශය තීරණය කර ඇත. වී වගාවේ දුඹුරු පැළ කීඩෑ හානිය, බඩඉරිඟු වගාවේ සේනා දළඹු හානිය, අර්තාපල් වගාවේ දිලීර වැනි එක් එක් වගාවන්ට ආසාදනය වන විශේෂිත වසංගත රෝගවලට අවශ්‍ය පළිබෝධනාශක ආනයනය කිරීමට නියමිතය.
මෙම පළිබෝධනාශක භාවිත නොකිරීම මගින් ජාතික නිෂ්පාදනයට බලපෑම් එල්ල විය හැකි බැවින් පළිබෝධනාශක ආනයනය කිරීමට සැලසුම් කර ඇත.
ලංකා ඛනිජ තෙල් නීතිගත සංස්ථාව යටතේ ඇති කෘෂිරසායන අංශය මගින් හෝ පළිබෝධනාශක නිෂ්පාදනය කරන මවු සමාගම්වල දැනටමත් ලියාපදිංචි වී ඇති දේශීය නියෝජිත සමාගම් මගින් පළිබෝධනාශක ආනයනය කිරීමට නියමිතය.
වගා කන්නයකට අවශ්‍යතාවයෙන් 10%ක් පමණ ආනයනය කිරීමට කෘෂිකර්ම අමාත්‍යාංශය යෝජනා කර ඇත. ආනයනය කරන පළිබෝධනාශක කෘෂිකර්ම දෙපාර්තමේන්තු අධීක්ෂණය යටතේ ඛනිජ තෙල් නීතිගත සංස්ථා ගබඩාවල ගබඩා කර තැබීමට නියමිතය. කෘෂිකර්ම දෙපාර්තමේන්තුව නම් කරන පාර්ශ්ව වෙත පමණක් නිදහස් කිරීමටද සැලසුම් කර ඇත.
තවද පළිබෝධනාශක රෙජිස්ට්‍රාර්වරයාගේ අනුමැතිය යටතේ දේශීය සමාගම් ආනයනය කරන පළිබෝධනාශක විවෘත වෙළෙඳපොළේ විකිණීම සඳහා නිකුත් කිරීමටද නියමිතය. පරිසර හිතකාමී වගාවන් සඳහා භාවිත කළ හැකි පළිබෝධනාශක මෙලෙස අලෙවි කළ යුතු වෙයි.