පසුගිය දින 14 ක කාලය තුළ වියට්නාමයේ සංචාරය කර ඇති මගීන්ට වහාම ක්‍රියාත්මක වන පරිදි ශ්රී ලංකාවට ඇතුළු වීමට අවසර නැති බව සිවිල් ගුවන් සේවා අධිකාරිය ගුවන් සමාගම්වලට දන්වා තිබේ.
සිවිල් ගුවන් සේවා අධිකාරියේ අධ්‍යක්ෂ ජනරාල් කපිතාන් තේමිය අබේවික්‍රම මහතා පැවසුවේ, මෙම තහනම නැවත දැනුම් දෙන තුරු ක්‍රියාත්මක බවයි.
සියලු ගුවන් සමාගම් වෙත මෙම නිවේදනය නිකුත් කර ඇති බව ද අධ්‍යක්ෂ ජනරාල්වරයා පැවසී ය.
මේ අතර වියට්නාමයෙන් නව දෙමුහුන් කොරෝනා ප්‍රභේදයක් හඳුනාගෙන ඇති බවට පසුගිය දා විදෙස් මාධ්‍ය වාර්තා කර තිබිණ.
එරට සෞඛ්‍ය අමාත්‍යවරයා සඳහන් කර තිබුණේ, එය ඉන්දියාවෙන් සහ බ්‍රිතාන්‍යයෙන් හඳුනා ගැනුණු වෛරස් ප්‍රභේදවල එකතුවකින් නිර්මාණය වූ නව වෛරස් ප්‍රභේදයක් බවයි.
ඉතා භයානක එම වෛරස් කාණ්ඩය වාතයෙන් ව්‍යාප්ත විය හැකි බව ද ඔහු පවසා තිබිණ.