පොල්වත්ත පවුලෙන් පොළොන්නරුව රණවිරුවෙකුට විද්‍යුත් ආරෝපිත යතුරු පැදියක් පරිත්‍යාග කෙරේ
පොලොන්නරුව දිස්ත්‍රික්කයේ හිගුරක්ගොඩ රණවිරු සංසදයේ ජී.ඒ.එස්.චතුරංග රණවිරුවා වෙත විද්‍යුත් ආරෝපිත යතුරු පැදියක් පරිත්‍යාග කිරීම ප්‍රසාද් පොල්වත්ත මහතා ඇතුළු එම පවුලේ සාමාජිකයන්ගේ දායකත්වයෙන් අද දින රණවිරු සේවා අධිකාරියේ දී සිදුවිය.
ප්‍රවීණ ලේඛකයෙකු හා බැංකු කරුවකු වන “අමරණීය සොල්දාදුවන් 32” කෘතියේ කතෘ, ප්‍රසාද් පොල්වත්ත මහතා විසින් රණවිරුවන් උදෙසා සිදුකරන සුබසාධන ව්‍යාපෘතීන් තවත් ඉදිරියට පියවරක් තබමින් රණක්ෂිතයට පත් රණවිරුවෙකු හට අවශ්‍ය නවීනතම විද්‍යුත් ආරෝපිත යතුරු පැදියක් ලබාදීම සඳහා අනුග්‍රාහකත්වය ලබා දෙන ලදී.
මේ සඳහා ප්‍රවීණ බැංකුකරුවකු සහ කතුවරයෙකු වන ප්‍රසාද් පොල්වත්ත මහතා සහ ඔහුගේ ආදරණීය බිරිඳ හර්ෂි පොල්වත්ත ඇතුළු ඕස්ට්‍රේලියාවේ පදිංචි ප්‍රසාද් පොල්වත්ත මහතාගේ සොයුරු ප්‍රසන්න පොල්වත්ත විසින් මූල්‍ය අනුග්‍රාහකත්වය දක්වන ලදී.
රණවිරු සේවා අධිකාරියේ සභාපති, මේජර් ජෙනරල් නන්දන සේනාධීර (විශ්‍රාමික), සභාපති තුමන්ගේ ජ්‍යෙෂ්ඨ පුද්ගලික ලේකම්, බ්‍රිගේඩියර් රෝෂන් තිරිමාන්න, වැඩසටහන් නිලධාරීනී, නෙත්මි ගයශ්‍රී ඇතුළු රණවිරු පවුලේ සාමාජිකයන් මෙම අවස්ථාවට සහභාගි විය.
