සිංහල ජනතාව කිසි දිනක ජාතිවාදී ගමනක් නොයන බව අමාත්‍ය ඒ.එච්.එම්. ෆවුසි මහතා පවසයි.
හෙතෙම මේ බව කියා සිටියේ ගාලුමුවදොර පිටියේ ඉදිකළ ලොව විශාලතම කෘතිම නත්තල් ගස ඊයේ සිව් වැනි දිනයට විවෘත කිරීමේ අවස්ථාවට එක්වෙමිනි.
“අපිට දේශපාලන ප්‍ර‍තිපත්තියක් තිබිය යුතුයි. නමුත් ආගමික කටයුතුවලදී සහ ජාතික උත්සවයන්හිදී අපි සියලුදෙනාම එකා මෙන් සිටිය යුතුයි. මැතිවරණ කාලයට කළ යුත්තේ ඒ මැතිවරණ කටයුතු. නමුත් ඒ කාලයේදී ජාතිකත්වය මූලික කරගනිමින් ඡන්ද ලබා ගන්න උත්සාහ කරනවා. කොළඹ දිස්ත්‍රික්කයේ බොහෝමයක් සිංහල බෞද්ධ ජනතාව. ඒ වුණත් ඡන්දෙන් මම ජයග්‍ර‍ණය කළා. සිංහල බෞද්ධ ජනතාව කිසි දිනෙක ජාතිවාදී ගමනක් යන්නේ නැහැ. එක්කෙනෙක් දෙන්නෙක් ඉන්නවා ජතිවාදය අවුස්සමින් මේ රටේ සාමය නැති කරන්න උත්සාහ ගන්න. නමුත් අපි එයට ඉඩ නොදිය යුතුයි. අපි සියලු දෙනාම එකට සිටිය යුතුයි.“ යැයිද ඇමතිවරයා කියා සිටියේය.