ආවා කල්ලියට සම්බන්ධ බවට සැකපිට රක්ෂිත බන්ධනාගාරගත කර සිටි පුද්ගලයින් 11 දෙනෙකු ඇප මත මුදාහැරීමට කොළඹ අතිරේක මහේස්ත‍්‍රාත් අරුණි ආටිගල අද නියෝග කළාය.
ඒ, නීතිපතිවරයා විසින් ඉදිරිපත් කරන ලද වාර්තාවක් සැලකිල්ලට ගනිමින්.
පසුගිය දිනවල යාපනය ප්‍රදේශයේ සිදුවූ ප්‍රචණ්ඩකාරී සිදුවීම්වලට සම්බන්ධ “ආවා“ නමැති කණ්ඩායමක් සම්බන්ධ බවට තොරතුරු වාර්තා වී තිබුණි.
ඒ අනුව ත්‍රස්ත මර්දන කාර්යාංශය විසින් සිදුකළ විමර්ශනවලදී එම කණ්ඩායමට සම්බන්ධ බවට සැකපිට මෙම සැකකරුවන් 11 දෙනා අත්අඩංගුවට ගෙන තිබු අතර ඔවුන් අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගත කෙරුණි.
මෙම සැකකරුවන්ට එරෙහිව ත‍්‍රස්තවාදය වැළැක්වීමේ පනත යටතේ කටයුතු නොකරන බවත්, මුදල් විශුද්ධිකරණ පනත සහ ත‍්‍රස්තවාදයට මුදල් සැපයීම සම්බන්ධ පනත යටතේ ඔවුන්ට එරෙහිව කටයුතු කරන බවත් එහි සඳහන්.
සැකකරුවන්ට රුපියල් ලක්ෂ 10ක ශරීර ඇප දෙක බැගින් නියම කෙරුණි.